كلنا بيقابلنا مشاكل صغيرة وإحنا بنطبخ لكنها بتبوظ علينا الطبخة كلها ومش بنكون عارفين نتصرف إزاي، هنرمي الأكل ولا هنبتدي من الأول، طب مفيش حركات سحرية تقدر تنقذنا في المواقف دي؟ لا فيه.. دي نصايح بسيطة وسريعة علشان نصلح غلطات بنقع فيها وإحنا بنعمل الأكل، من الملح الزيادة في الأكل للتسوية الزايدة أو الأكل السبايسي زيادة عن اللزوم، أو مسكر، أو حتى الحلويات اللي سكرها زاد مننا، فتعالوا نعرف إزاي نحل الغلطات دي.
الملح الزيادة
لو لقيت إنك زودت الملح في الأكل ومش عارف تعمل إيه، ممكن تحل الحكاية كلها بإنك تحط حتة بطاطس نية، معروف إن البطاطس بتمتص الملح من الأكل، وممكن كمان تعالجه بإنك تضيف شوية خل أو لمون، بس لو كانت شوربة مش هتحتاج كل ده وهتزودلها شوية مياه بس.
الأكل السبايسي
أما الأكل اللي الشطة زادت فيه، فممكن نصلحه بإننا نزود شوية سكر صغيرين، أو زبدة، وممكن تزود مقدار الأكل نفسه علشان الشطة والتوابل عمومًا تتوزع على كمية أكبر فكميتها تقل.
الأكل المحروق
لو نسيت الأكل وابتدى يتحرق، املي مياه باردة في طبق كبير وحطي فيه حلة الأكل، واكشفي الغطا وسيبي البخار كله يطلع، بعد كده معظم الناس بتلجأ لإنها تشيل الجزء المحروق من الحلة وتكمل، لكن في الحالة دي لازم نشيل الجزء المحروق وننقل السليم لحلة تانية ونكمل تسويتها.
السكر الزايد في الحلويات
أما بقى لو السكر زاد في الحلويات، ممكن نصلح ده من غير ما نضطر ناكلها مسكرة زيادة عن اللزوم، عن طريق إننا نضيف عصارة لمون، أو خل التفاح، والحلويات اللي ماينفعش معاها اللمون، الأحسن نزودلها المياه، وكمان زيت الزيتون مفيد في الحالة دي.