الشتا له تفاصيل كده مختلفة عن أي فصل تاني، بنستناه من السنة للسنة علشان نعيشها ونستمتع بها، وده لأسباب كتيرة من أهمها إن الناس بتقعد مع بعض أكتر وبتتجمع أكتر في جو من الألفة والدفا على صوت الدفاية أو المطر أو لما بيولعوا السبرتاية علشان يشربوا حاجة سخنة تدفيهم، كلها تفاصيل مش بتعملها أو بتعيشها غير مع أول نسمة هوا بتقول لك إن الفصل المحبب لقلوبنا على الأبواب.
أسباب بتخلينا متعلقين بالشتا مهما كبرنا
المشي تحت المطر
المشي تحت المطر يعتبر متعة من متع الشتا، إنك تحس بالمطر وهو بيلمس وشك، ولما بترسم على الإزاز بالبخار، وريحة الشوارع والشجر بعد لما المطر يخلص، ونسمة الهوا اللي بتيجي بعدها، كل اللحظات دي مش بنلاقيها مع أي فصل تاني في السنة.
صوت فيروز
صوت فيروز مرتبط معانا دايمًا بالوقت ده، يعني لو عايز تسمع أغنية وتعيشك في جو ومود الشتا، مش هتلاقي زيّ صوتها اللي مليان دفا زيّ كلامها اللي في أغانيها، تسمعه وأنت تحت البطانية وأنت ماشي في العربية وأنت قاعد في البلكونة بالليل، ده غير إن لها أكتر من أغنية معمولين مخصوص علشان يتسمعوا في الشتا، منهم أغنية حبيتك بالصيف وحبيتك بالشتا ورجعت الشتوية وشتي الدنيا.
الأكلات اللي مش بنقربلها غير في الشتا
في كده تشكيلة أكل معينة مش بتتعمل غير في الفصل ده، علشان بتحسسنا بالدفا وفي نفس الوقت بتدينا طاقة، زيّ العدس والفول والبليلة وحمص الشام، ده غير الحاجات اللي مش بنشربها غير في الوقت ده زيّ السحلب.
التفاصيل اللي بتبقى في لبس الشتا
من أهم الأسباب اللي بنستنى الفصل ده علشانها هو اللبس، لإنه بيبقى أشيك من لبس الصيف وله تفاصيل كتير والقطع اللي بتتلبس بتبقى مختلفة وكتيرة وممكن تتلبس بكذا طريقة.
مش هتضطر تخرج من البيت كتير
القعدة في البيت في الفصل ده بتبقى محببة عند معظم الناس حتى الناس اللي كانت بتحب الخروج الكتير والسفر في الصيف. ولكن في الشتا بيفضلوا قعدة البيت أكتر والأنتخة، خصوصًا إن بيبقى لها جوها الخاص في الشتا، وأي نشاط بتمارسه فيها حتى لو بسيط بيبقى أمتع وله إحساس مختلف، زيّ القعدة مع العيلة والصحاب والرغي والسهر على الدفاية، وزيّ قراءة الكتب اللي اتردم عليها التراب من ساعة ما جبتهم وماكانش لهم وقت، والفرجة على الأفلام والمسلسلات اللي متحوشين من السنة اللي فاتت وأنت قاعد بتشرب حاجة سخنة ومتكلفت في البطانية.