من حوالي أسبوع واحنا بنعيش يوم بيوم مع أزمة انقطاع التيار الكهربائي، لتخفيف الأحمال بسبب موجة الحر الشديدة وارتفاع درجات الحرارة لمعدلات غير مسبوقة في مصر، وبسبب الحر بدأ يظهر خلافات ماكنتش موجودة، والمواضيع بدأت تكبر لوحدها ونبدأ نسأل أسئلة وجودية” هي الناس كانت عايشة ازاي من غير كهرباء؟”.
وبسبب إنك مش عارف تلاقيها منين ولا منين، أعلنت الشركة القابضة لكهرباء مصر بيان بيتضمن نظام لفصل التيار الكهربائي علشان كل الناس تاخد بالها، وحددت مواعيد انقطاع الكهرباء بمعدل عشر دقائق قبل رأس الساعة وعشر دقائق بعدها، يعني لو النور ماقطعش 1:50 ولا 2:10 فأنت كده في الأمان، دي فترة مسموحلك تعمل فيها كل حاجة منها استخدام الأسانسير “منطقة خضراء” لحد ما تيجي الساعة 2:50 لحد 3:10 وتبدي تقلق تاني وهكذا على مدار اليوم.
ولإن مع انقطاع التيار هتبقى قاعد متخوف من ركوب الأسانسير خصوصًا إن البيان نفسه حذر من استخدامه خلال الفترة المحددة و طبعًا لو فاتك في الفترة ما بين 2:15 لـ2:45 هتضطر تستنى لحد تلاتة وتلت علشان تبقى في الأمان لإنها ممكن تقطع في التلت ساعة دي، وضيف عندك ساعة كمان. ولإن تعطيل الأسانسير وارد وحبستك فيه واردة أكتر.. هنقولك تعمل إيه لو فاتك مواعيد الأمان أو المنطقة الخضراء واضطريت تستخدمه في توقيت المنطقة المحظورة ولاقدر الله اتحبست في الأسانسير.
تعمل إيه لو فاتك اسانسير إلا عشرة واتحبست في عشرة وربع
- خد احتياطاتك: في حالات انقطاع الكهرباء المتكرر ركوب المصاعد “الأسانسير” شيء غير مُحبذ وغير مضمون، ولكن لو اضطرتك الظروف لاستخدامه، حاول تاخد احتياطك وتخلي على الأقل شخص أو اتنين عارفين إنك هتستخدمه وعارفين وقت استخدامك له بالظبط، لو أسانيسر البيت بلغ حد من أهلك قبل ما تطلع فيه، علشان لو حصل أي عطل يلبغ حارس العمارة أو أي مسؤول يقدر يتصرف لإنهم ممكن يفتحوه بشكل يدوي.
- الهدوء يا عزيزي: حاول على قدر ما تقدر تحافظ على هدوئك، لإن معروف إن التوتر بيزود معدلات ضربات القلب وبيرفع مستوى هرمون الأدرينالين في الجسم، وبالتالي هتبقى أكتر عرضة لضيق التنفس أو ارتفاع في ضغط الدم، وفي الموقف ده ضروري الحفاظ على مستوى التنفس، وده هيساعدك كل ما زادت فترة تعطيل الأسانسير حسب كلام الأطباء، وده طبعًا في حالة إن المصاعد مش مصممة على أساس وجود وسائل تهوية.
- التوازن: امسك مقابض الأسانسير بتحكم واسند ضهرك ورقبتك على واحدة من الجوانب بشكل مستقيم، وده احتياطي في حالة تعرضه لهبوط مفاجيء ولحماية جسمك
- خد حذرك: لو في أسوأ الظروف حسيت إن الأسانسير هيقع، لازم تسند على الأرض، وتقوم بثني الركبتين، علشان نقلل من فرص حدوث الكسور، ومش محتاجين ننهبك إنك ماتستخدمش أزرار الأسانسير بعنف كإنك بتلعب بيهم.
- ماتتهورش: استخدم جرس الإنذار المتوفر في المكان، واستنى موظفين الطواريء وماتحاولش الخروج بنفسك من الأبواب المفتوحة جزئيًا أو بفتح الأبواب أو الهروب من الفتحة الموجودة في أعلى نقطة في الأسانسير علشان ماتعرضش حياتك للخطر
- اعمل قلق: من نصائح الخبراء في حالة عدم وجود وسيلة إنذار أو ماحدش عنده علم إنك في الأسانسير، اعمل دوشة علشان الناس تسمعك، خبط على الباب بهدوء ونادي كل 5 دقائق علشان ممكن يكون في الوقت ده ماحدش في العمارة أو متواجد في محيطك. لكن مع الحفاظ على هدوئك زي ما اتفقنا في الأول.
وآخر حاجة لو فاتك استخدام الأسانسير في المنطقة الخضراء، خليك في الأمان واستنى، ولو سألوك اتأخرت في الشغل ليه قول له “فاتني أسانسير 9 إلا ربع فاستنيت 10 وثلث” ولو الكهرباء قطعت زود ساعة كمان، أو انزل على رجلك واعمل رياضة وكمل مشي على رجلك وتبقى كسبت تلاتة في واحد ” روحت الشغل في ميعادك، عملت رياضة، أخدت تان مجاني”.
