بعد ما بتستلم شهادة التخرج من الجامعة بيبقى قدامك حل من اتنين؛ إنك تبروزها وتعلقها على الحيطة جنب شهادات التكريم اللي كنت بتاخدها من المدرسة، أو إنك تقرر تنزل لحياة الشغل وتحقيق الكيان والكلام الكبير اللي جاب لنا الضغط والسكر.. بس قبل ما تقرر إنك تدخل جوا الدوامة دي وتبقى قدها، في حاجات لازم تاخد بالك منها وتعملها علشان مايتحطش عليك جوا دوامة الشغل، علشان اللي شوفته في الجامعة حمادة واللي هتشوفه حمادة تاني خالص.. فاجمد كده وماتعيطش.
خلي حياتك إيميلات بعد كده
علشان تبقى شخص مهني أو زيّ ما بيقولوا عليه “بروفيشنال”، ابعت إيميل، طول ما أنت ماشي ابعت في إيميلات؛ عايز إجازة، بتشتكي من حاجة، الواي فاي قطع، كله إيميلات، وخصوصًا الناس اللي مش طايقهم، علشان ممكن في إيميل من الإيميلات تمسك عليهم غلطة ويبقى دليل إدانتهم ودي نصيحة أخوية مني. وقدام بعد ما تقعد شوية في المكان، هتلاقي خلقك بيبقى أضيق وأضيق وهتحس إنك مش عايز تتعامل مع بشر فالإيميل هيبقى وسيلة إنقاذ كويسة.
أظبط أربع منبهات احتياطي
لمعلوماتك ولو أنت جديد في الكار وأول مرة تشتغل، فالتأخير مش زيّ في الجامعة تتخصم لك درجات، لأ ده خصم من قوتك ومن لحمك الحي وتعبك وشقاك. فلازم تتعلم تصحى بدري وتظبط أقل حاجة أربع منبهات؛ الأول علشان يدي لك إشارة، والتاني هيدي لك غفوة سريعة، والتالت علشان تكمل باقي الغفوة السريعة، والأخير علشان يقولك لم نفسك واصحى بقى.
خليك مستعد نفسيًا لاجتماعات باقي حياتك
من وأنت بتمضي العقد بيبقى شرط أساسي إنك لازم تحضر أي اجتماع شغل يتعمل، وطبعًا واحد زيك ماكنش بيقعد في المحاضرة نص ساعة على بعض وبيعمل أي حاجة علشان الدكتور يطرده ويلحق طلب الشاورما السوري اللي طالبه، مش هيعرف يستحمل اجتماع تلات ساعات كل أسبوع من غير ما يحط دماغه وينام شوية أو يسمع أغاني أو يشخبط على الورق زيّ ما كان بيعمل في المحاضرة. المهم إن الاجتماع له أداء معين، لازم تبقى باين إنك مصحصح ومركز حتى لو أنت سرحان، ولو مش فاهم حاجة، هز بدماغك وخلاص، وأهم حاجة التواصل البصري حتى لو كنت بتفكر هتطلب أكل إيه بعد الاجتماع.
اصحى ليغفلوك
خليك مصحصح أوي لشخصيات معينة زيّ الإتش آر مثلًا، لإنه في الغالب هيبقى واقف لك على الغلطة، وده لإنه ماشي رسمي أوي ومش هتعرف تخلع منه، يعني راح أيام لو عايز تروّح تكلم حد من أهلك في التليفون علشان يعدي عليك وياخدك في سكته. الحل الوحيد إنك تمشي قبل ساعات العمل الرسمية إنك تكون اترفدت أو رايح على المستشفى، غير كدة لازم تقدم طلب وياخد موافقة كإنك بتقدم على هجرة.
لازم تمشي أمورك مع زمايلك
ما أنت أصلك هتقعد معاهم 8 ساعات ويمكن تتكدر ويبقوا أكتر، ده غير إنهم مش لازم يبقوا من نوعية الناس اللي ينفعوا يبقوا أصحابك زيّ الجامعة لإن أنت مابتختارهمش لكن هما بيتفرضوا عليك. المهم، اعرف ازاي تتعامل مع كل الشخصيات، هتلاقي واحد بيمشي يكلم نفسه الصبح، وواحد بيشتم في الشركة، وواحد فاقد الشغف، واحد بيدوّر على شغل تاني من إيميل الشركة الجاحد، وفي العصفورة اللي بتعملك خوازيق، فلازم تسايس كل دول علشان تعرف تمشي أمورك.
ماتعيطش
في مواقف كتير هتعدي عليك وأنت في الشغل هتحسسك بالانهيار التام، واللي هو أنا عايزة أروح أقعد في أوضتي وأشرب الشاي باللبن، وأنا إيه اللي دخلني في كل الحوارات دي، فماتعيطش لو لقيت نفسك بتشتغل بعد مواعيد الشغل، ومش لازم يكونوا طالبين منك حاجة على فكرة في الوقت ده، بس أنت من غير حاجة دماغك بتتسحل في الحاجات اللي هتعملها بعد إجازتك، فلازم تتعلم حاجتين؛ إنك تفصل وماتعيطتش.