واقعة بيشهدها القضاء المصري لأول مرة في تاريخه وفي تاريخ محاكم الأسرة، سيدة رفعت دعوى نشوز ضد زوجها وطلبته في بيت الطاعة بعد ما أهملها واتهرب من إنه يصرف عليها وعلى أطفالها، وبعد ما وصلت الخلافات لطريق مسدود وكل محاولات الصلح ماجبتش نتيجة، وبعد ما هو أنذرها بالطاعة في الأول واتهمها برضه بالنشوز، فقررت هي كمان تتهمه بالنشوز وترفع إنذار طاعة.
علشان نعرف إمكانية إقامة دعوى زيّ دي من جهة الزوجة كمان ومدى صحتها من وجهة نظر الدين والقانون، اتكلمنا مع المستشار عاصم العريبي، والشيخ والداعية خالد الجمل.
المستشار عاصم العريبي
سألنا المستشار عاصم العريبي لو في حاجة في القانون تدي الحق للست إنها ممكن تطلب جوزها في بيت الطاعة، قال “الطاعة ليست واجبة على الزوج حتى لو كانت الست هي صاحبة العصمة، الطاعة واجب مستقل وحق للزوج على زوجته، ومفيش حاجة في القانون بتقول إن الست تطلب جوزها في بيت الطاعة، ولو مابيصرفش عليها، لها طريق تاني وهو إنها ترفع دعوى طلاق”.
كلامنا مع الشيخ والداعية خالد الجمل
اتكلم في البداية عن النفقة وحكمها في الدين لو الزوج رفض إنه يصرف على زوجته، وقال”النفقة واجبة على الزوج تجاه زوجته وأولاده، أنت لازم توفر لهم الحياة الكريمة حتى لو في بينكم خلافات، واللي مايعملش كده يبقى آثم، وبناءًا عليه الشرع والقانون بيدي للست الإمكانية إنها تاخد حقها”.
وقال بخصوص دعوى النشوز إن “الست ممكن تبقى ناشز والراجل كمان، في سورة النساء “وَإِنِ ٱمْرَأَةٌ خَافَتْ مِنۢ بَعْلِهَا نُشُوزًا أَوْ إِعْرَاضًا فَلَا جُنَاحَ عَلَيْهِمَآ أَن يُصْلِحَا بَيْنَهُمَا صُلْحًا ۚ وَٱلصُّلْحُ خَيْرٌ ۗ وَأُحْضِرَتِ ٱلْأَنفُسُ ٱلشُّحَّ ۚ وَإِن تُحْسِنُواْ وَتَتَّقُواْ فَإِنَّ ٱللَّهَ كَانَ بِمَا تَعْمَلُونَ خَبِيرًا“. وكمل كلامه وقال إن النشوز هو التعالي إن الزوج يبعد عن زوجته بشكل فيه تعالي وكبر ويقول “أنا مش هصرف عليكم أنتم ماتلزمونيش”.
وكمل كلامه إن “الشرع والقانون بيدي الست الحق إنها ترفع قضية دعوى “نشوز” لاسترداد حقها، بس بالنسبة لبيت الطاعة الزوج مافيش حاجة عنده اسمها بيت طاعة، الزوج هو اللي بيطلب الست تييجي البيت في حالة لو سابته ومشيت ومارجعتش تاني، فالقانون بيدي الحق للزوج إنه يرفع دعوى علشان يخلي الزوجة ترجع، بيت الطاعة اللي بنشوفها في المسلسلات صورة مبالغ فيها، واللي يهمنا في الخبر اللي اتنشر إن أول مرة الناس تسمع إن الزوج بينشز وأنا بقول لهم نعم الزوج ينشز زيّ الزوجة بالظبط ومن حقها رفع دعوى”.