معروف إن الانطباع الأول بيدوم وعلشان كده لازم نبقى مركزين واحنا رايحيين في مشاويير معينة كده حياتية وبتحدد مستقبل ومصائر، زيّ الإنترفيو “المقابلات” اللي بتتعمل وأنت بتقدم على وظيفة أحلامك، وأهم المشاويير وأنت رايح تخطب وتكمل نص دينك، وفي ناس مابتبقاش عارفة المفروض تعمل إيه أو ماتعملش إيه، فاحنا جبنالك كتالوج بيشرحلك إتيكيت أول زيارة لأهل العروسة.
خد ميعاد قبلها
وده شيء بديهي وبيعمله أي حد بيفهم في الأصول، مش معقول الناس تصحى من النوم تلاقي حد بيخبط عليهم وهما قاعدين بالبيجامة ويقولهم عايز أخطب بنتك، وده إتيكيت بيبقى المفروض موجود في كل الأوقات وأنت رايح تزور الناس مش بس وأنت رايح تخطب، وأهم حاجة وأنت بتحدد المعاد تشوف إيه اللي يناسب أهل العروسة في الأول وبتشوف بعدها الميعاد مناسب ليك ولا لأ، ويُفضل يبقى يوم إجازة وياريت ماتتفقش على ميعاد يكون وقت غذاء.
بلاش أطفال
أول مناسبة بتبقى رسمية شوية، فالناس بتبقى على أعصابها ومتوترة، فمفيش داعي تجيب معاك أطفال شقية وزنانة يجروا في الشقة ولا يعملوا دوشة، ومش بعيد يكسروا لك حاجة ولو الجوازة ماتمتش يدفعوك تمن الحاجات اللي اتكسرت. خليك رايح ملصم نفسك علشان تقول الكلمتين وتمشي، بس بالنسبة للناس اللي تاخدهم معاك وأنت رايح الأقاويل والآراء اختلفت؛ في ناس بتقول إنك تروح لوحدك أول مرة علشان تجس النبض وفي المرة التانية تجيب الأهل زيّ الأب والأخ الكبير والأم، وفي ناس بتقول خش بعزوتك في أول مرة، بس في الحالتين لازم أهل العروسة يبقوا عارفين بعدد الناس اللي جاي ومين.
ماتدخلش بإيدك فاضية
ماينفعش يبقى أول مرة يشوفوك وأنت داخل إيد ورا وإيد قدام وداخل بطولك، خصوصًا عند العائلات العربية، بيعتبروها فضيحة وبنت خالة العروسة هتطلع عليك سمعة إنك بخيل، فعلى إيه كل ده.. هات حاجة بسيطة أو رمزية؛ ورد بس ممكن تبعته قبل ما تروح كحركة يعني، أو علبة شوكولاتة، أو شوف العروسة ممكن تكون بتحب إيه وهاته، وكل واحد وعلى قد إمكانياته بس حاول ماتسترخصش.
فن اختيار المواضيع
يعني مفيش أي داعي نتكلم في مواضيع بعيدة عن الهدف الرسمي للقعدة، وخصوصًا السياسة والرياضة أو الدين، علشان لو التوجهات مختلفة وأهل العروسة طلعوا متعصبين لفئة معينة هيقلبوا عليك الترابيزة والجوازة هتبوظ، ومفيش داعي برضه تتكلم في مواضيع زيّ علاقاتك السابقة أو علاقتها، ده مش مكانه ولا وقته، تبقوا تتكلموا فيه وأنت قاعد مع عروستك في كازينو على النيل بتشربوا اتنين لمون.. يُفضل أول مرة تبقى قعدة تعارف علشان تكسروا التلج اللي ما بينكم.
هتلبس إيه؟
خبراء الإتيكيت بيفضلوا السمارت كاجوال وبيقولوا بلاش فورمال في أول مرة وتلبس ببيونة وجرافتة بقى والجزمة اللي عاملة زيّ المركب دي وجو البدل الرسمية ده، ممكن جاكت أو بليزر مع بنطلون جبردين وقميص من غير جرافتة، بس ماتروحش تلبس جينز أو كإنك رايح الجيم، وخلي بالك المظهر، خصوصًا أول مرة، مهم وبيمثل نسبة كبيرة من تكوين الانطباع الأول.. وأخر حاجة بننصحك بيها خليك صريح ومش متكلف وعلى طبيعتك، وماتلبسش وش مش وشك.