الكادر أداة من أدوات المخرجين، حرفة مش أي مخرج يقدر يستخدمها ويستغلها صح، يقدر يخلق منها لوحات فنية سينمائية تقول كلام كتير من غير ما الممثل ينطق بحرف، وفي السينما في مجموعة من الأفلام كانت معروفة بكادرات الجمهور حبها بيها، كادرات بعينها أو في المجمل عملت حالة .. جمعناها ليكوا وقدمنا وجهة نظر ورأي الجمهور فيهم.
في بيتنا رجل
فيلم عن السياسة والحرية والحرب، بطولة عمر الشريف ورشدي أباظة وحسن يوسف وإخراج هنري بركا، الفيلم في كادرات بعينها الجمهور اتكلم عنها منهم مشهد إبراهيم “عمر الشريف” و هو هربان و مستخبي في بيت صديقه محي “حسن يوسف” و في الكادر ده بالتحديد بيراقب إبراهيم بنظرة خوف و ترقب الشارع، علشان يعرف إذا كان فيه مخبرين سريين ولا لأ، الجمهور شاف أن عبقرية الكادر أن عناصر الصورة محدودة مفيش غير نص وش عمر الشريف و شيش .. و مطلوب من المخرج و الممثل أن يتم توصيل إحساس التوتر و الخوف و ده اللي نجحوا فيه.
وكادر تاني من أشهر الكادرات وصف فيهم باختصار شخصيات الأبطال من خلال وقفتهم ونظراتهم ولبسهم.
الباب المفتوح
فاتن حمامة ومحمود مرسي وصالح سليم قدموا حالة استثنائية عن معنى الحرية وفي مقابلها السلطة، وبناء على رؤية النقاد ومحبين الفن والسينما، برغم أن صالح سليم ومحمود مرسي (دكتور فؤاد وحسين عامر) الاتنين أطول من فاتن حمامة (ليلى) بفارق طول مش بسيط، إلا أن مخرج الفيلم هنري بركات صور كادرات المحادثة ما بين ليلى ودكتور فؤاد من جهة وما بين ليلى وحسين عامر من جهة تانية بطريقتين مختلفتين..
فتلاقي المحادثة بين ليلى ودكتور فؤاد بتاخدها الكاميرا بنفس مستوى طول الشخصيتين فيبان فرق الطول الكبير لصالح محمود مرسي الأمر اللي بيوضح أد إيه دكتور فؤاد بيبص لليلى نظرة فوقية وأد ايه هي بتحس بالضعف في النقاش معاه..
على الجانب الآخر الكاميرا بتلقط مناقشة ليلى مع حسين بشكل يبان ليلى في نفس مستوى طول حسين.. لأنها في وقت وجودها مع حسين بتحس بوجودها كست في اتخاذ القرار وبدون أي فوقية في التعامل.
زوجة رجل مهم
كادرات محمد خان الفيلم ده كانت كفيلة تفهمك طبيعة الشخصية خاصًة الشخصية اللي قدمها أحمد زكي، الراجل صاحب القوة والسلطة والجبروت وازاي عايش مع زوجته الرقيقة الحالمة ميرفت أمين.
كادرات على شخصية منى والتانية على هشام، توريك بمقارنة بسيطة الفرق بين رقتها وجموده، شكل حلقها مثلًا في مقابل طريقة تسريح شنبه، حركة صوابعها وهي بتلعب في خصل شعرها في مقابل حركة إيده وهو بتلعب بالمسدس.
الأرض
فلسفة في إختيار كادرات و زوايا تصوير مشاهد أفلام المخرج يوسف شاهين، تخليك تقف عندها شوية لأنها عملت لغة وتكوين لوحده، وفي فيلم الأرض المصنف ضمن أهم 100 فيلم في السينما المصرية، في كادرات بعينها كانت طاغية عليه والجمهور علق عليها وهي كادرات اللي محورها الأرض نفسها، كادرات مبهجة بتبين جمال الأرض، واعتبرها الجمهور كادرات مقصودة وفيها كل حكاية الفيلم، وبيهيأك بيها للي هيحصل بعد كده في الفيلم وازاي هيفدوا الأرض بأرواحهم.
خرج ولم يعد
حاجة مهمة لاحظها عشاق محمد خان وهو التحول اللي بيحصل في أحجام كادرات فيلم خرج ولم، الفيلم اللي بيتكلم ببساطة وسلاسة شديدة عن الفرق بين عيشة المدينة والريف، كادرات المدينة اللي بيبدأ بيها محمد خان الفيلم اللي بتكون كادرات ضيقة كئيبة وبتحسسك أنك داخل على فيلم حزين وبتتحول لزوايا واسعة مليانة براح لونه أخضر في أول ما يوصل بيها القرية.
آخر كلمة: ماتفوتوش قراءة: يوسف شاهين وبعض البهارات: السينما المصرية وبصمتها على جدران كان