انتشر فيديو اتقال عنه “شاهد ألطف طيار أردني”.. ليه ألطف طيار ممكن تشوفه؟ لإنه حقق حلم سيدة مسنة في رؤية القدس من الأعلى، ووثق تحقيق طلبها بنفسه وصوّر الفيديو ده، اللي ظهرت فيه الست وهي في كابينة الطيار ولابسة كمان الكاب الخاص به.
السيدة طلبت من الطيار إنها تقعد في مكانه في الكابينة علشان تقدر تشوف القدس من الأعلى، واستجاب لطلبها الطيار الأردني واصطحبها لكابينة القيادة، ومازحها أثناء تصويره للفيديو وقال: “هل ترغبين في القيادة؟”، وطلب من الركاب كمان يصوروها وهي قاعدة جنبه ولابسة الكاب.
في الفيديو اللطيف ده ظهرت سعادة السيدة وهي طايرة من الفرحة بتحقيق حلمها.
وتساءل البعض عن إجراءات السلامة اللي مش بتسمح بدخول كابينة الطيار، لكن الفيديو ظهر فيه إن الطيارة كانت لسه على الأرض، وظهر فيه كمان طاقم الطيارة. والفيديو كله استغرق ثواني حققت حلم سيدة مسنة من غير الإضرار بالسلامة والأمان على الطيارة.