الكيلو بـ 160 جنيه: باكستاني يبيع لحوم أحصنة في المنصورة
مباحث التموين تمكنت من ضبط رجل يحمل الجنسية الباكستانية، في قرية برق العز التابعة لدائرة مركز المنصورة، واكتشفوا إنه ذبح حصانين وبيبيعهم لأهالي القرية بسعر 160 جنيه للكيلو الواحد، لجذب الأهالي للشراء بالسعر القليل.
وقالت الدكتورة شيرين زكي، رئيس لجنة سلامة الغذاء في تصريحات، إن بعض الأجانب بيلجؤوا للغش، وده بسبب ضعف القوانين اللي بتخص الغش الغذائي، وأشارت إلى إن عقوبة الغش الغذائي لا تتعدى سنة سجن وغرامة لا تتعدى ١٠ آلاف جنيه، وعلشان كده طالبت بتغليظ القوانين وترحيل فوري لأي أجنبي يتم ضبطه بمواد غذائية فاسدة تباع للمواطن، سواء لحوم أو غيرها.
وطالبت الدكتورة شيرين زكي اللجنة التشريعية بالبرلمان المصري، بتغليظ قوانين الغش الغذائي، لإن القوانين الضعيفة أغرت الباكستاني باستغلال المواطنين وبيع لحمة خيول ب ١٦٠ جنيه.
الواقعة أثارت جدل بين الأهالي، خصوصًا بعد الإقبال اللي شهدته اللحوم بسبب سعرها، بدون ما يشككوا الأهالي في مصدرها.