اتعرض محل سوبر ماركت في مدينة المنزلة بمحافظة الدقهلية لسرقة مبلغ بيزيد عن 112 ألف جنيه، لحد هنا يبان الموضوع عادي وحادثة سرقة عادية بيحصل زيها كل يوم، ولكن بعد ما رصدت كاميرات المراقبة عملية السرقة كاملة، واتمكنوا ضباط المباحث من القبض على المتهم قبل مرور 48 ساعة، واتعرفوا على هويته، واسمه محمد 41 سنة، مسجل سرقات.
فجر مفاجأة، وقال في اعترافاته إنه اشترى بالمبلغ اللي سرقه عجل ودبحه ووزعه على أهالي قريته بجانب رز وبطاطس مجانًا، ومافضلش معاه في جيبه غير 1200 جنيه، وبرر ده وقال: “كنت عاوز أغسل ذنوبي”.
صاحب السوبر ماركت حافظ محمد فرحات، قال في أقواله إن المتهم دخل في الأول محل مجاور له لسرقة دجاج وبالفعل دبح 10 دجاجات لسرقتهم، وبعد ما انتهى لاحظ وجود شباك زجاج صغير بيفصل محل الفراخ ومحل السوبر ماركت، ففكر في دخول المحل، وبالفعل قدر إنه يدخل من من الشباك، وبدأ يدور في المكان، وتصادف وجود المبلغ في المحل، فأخده وساب المكان وماخدش الفراخ اللي دبحها.
وقال صاحب السوبر ماركت: “المتهم فاكر إنه عمل ثواب كبير بعد ما وزع اللحوم على الغلابة، وقال لي أنا بغسل ذنوبي، وعملت عمل خير، ولما أخرج من السجن هرد لك فلوسك”.
صاحب المحل ناشد أي حد أخد من اللحوم مجانًا إنه يرد قيمة اللي أخده، لإن المبلغ ده بيتاجر به وهيأثر على شغله وتجارته، وحرروا المحضر في جنح قسم شرطة المنزلة لسنة 2023، وبالعرض على النيابة العامة، أمرت بحبس المتهم 4 أيام على ذمة التحقيق.
الناس على السوشيال ميديا انقسمت ما بين إن مافيش تبرير للسرقة وما بين السخرية على الأوضاع اللي بيعيشها العالم والظروف الاقتصادية الصعبة دلوقتي، واعتبروا الحرامي “روبن هود الغلابة”، وشافوا إن الحرامي الطيب رزق مافيش كلام، وناس تانية كان شاغلها سؤال أعمق من ده، هو إن العجل اللي اشتراه الراجل بقى بـ 100 آلف جنيه؟