غير إنه أشهر مشروبات الدايت، وبنعمل كل الكوارث في الأكل ونقول إنه هو السحر اللي هنشربه يظبط كل السعرات اللي أكلناها ومعتبرينه بطل خارق، الشاي الأخضر مش بس له فوائد للجسم وبيساعد في حرق الدهون، كمان له استخدامات مختلفة للبشرة والشعر مفيدة وبتعمل فرق وبطريقة سهلة، بمكوّن طبيعي، تعالوا نعرف ممكن نستخدمه ازاي.
للهالات وانتفاخ تحت العين
يمكن أشهر طريقة لاستخدام الشاي الأخضر في وصفات للبشرة، وبتعمل فرق في وقت قصير، استخدامه لعلاج الهالات تحت العين وكمان الانتفاخ والتورم في المنطقة دي، وبسهولة، هنستخدم باكيت الشاي الأخضر الباردة على المنطقة ونسيبها دقايق. زيّ ما بنعمل كمادات.
لمعان الشعر
الشاي الأخضر بيستخدم في وصفة بتدي الشعر لمعة صحية، واستخدامها سهل زيّ وصفة مياه الرز المنتشرة دلوقتي، بنرش الشاي الأخضر على الشعر ونسيبه حوالي نص ساعة بعدين نشطفه بالمياه.
سكراب للبشرة
الشاي الأخضر بيساعد على شد الجلد، وعلشان كده استخدامه كمقشر للبشرة بيكون مفيد، والطريقة: بنجيب معلقة من أوراق الشاي الأخضر أو نفضي محتويات باكيت، ونخلطهم في طبق مع إضافة سكر ومياه ونخلطهم لحد ما يبقوا عجينة، ونعملها ماسك للوجه، وبعد كده نشطفه بالمياه.
ماسك للبشرة الدهنية
الشاي الأخضر بيساعد على حماية البشرة من التصبغات، وفي وصفة بسيطة للبشرة الدهنية وطريقتها: خلط معلقة صغيرة من الرز المطحون مع معلقة صغيرة من عصير الليمون ومعلقتين من الشاي الأخضر المغلي بعد ما يبرد، وبعد خلط المكونات بيتحط الماسك على البشرة لمدة ربع ساعة وبعدها يتغسل بمياه باردة.
تونر
التونر بيستخدم بعد تنضيف البشرة وقبل الترطيب، وعلشان الشاي الأخضر بيساعد على تقليل خلايا الجلد، ممكن نعمل تونر من الشاي الأخضر بطريقة بسيطة: هنعمل كوب شاي أخضر عادي ونسيبه يتنقع 10 دقايق، وبعدين نخرج كيس الشاي ونحط السائل في وعاء محكم الغلق أو في بخاخة ونحطها في الثلاجة حوالي ساعتين.