هيقدر سكان كوكب الأرض إنهم يشوفوا معظم كواكب المجموعة الشمسية لدقائق معدودة فجر يوم الأربعاء، وده هيكون حوالى الساعة 4:20 الفجر بالتوقيت المحلى لمدينة القاهرة.
المجموعة الشمسية اللي بتنتمي ليها الأرض بتتكون من 8 كواكب وهما بالترتيب من حيث قربهم للشمس، عطارد، والزهرة، والأرض، والمريخ، والمشترى، وزحل، وأورانوس، ونبتون. وبالنسبة لدرجة سطوع الكواكب دي لسكان الأرض، فهو بيعتمد بشكل كبير على موقعها من الشمس، وحجم الكوكب نفسه، وموقعه من الأرض، ويوم الأربعاء هيكون اليوم المناسب فلكيًا لظهور أغلبهم لينا بسهولة.
فمثلًا كواكب عطارد والزهرة والمريخ والمشترى وزحل بيكون سهل رؤيتهم أغلب أوقات السنة وده لقربهم من الأرض وحجمهم الكبير، بس كواكب نيبتون، وأورانوس نادرًا ما بيقدر سكان الأرض يشوفوهم غير في أوقات معينة زي يوم الأربعاء، وده لأن سماء شهر يوليو الحالي مميزة بشكل كبير فلكيًا.
القمر كان بدر ٥ يوليو، ومر بخسوف شبه ظلى بس للأسف مقدرناش نشوفه في مصر، وفى يوم ٦ يوليو اقترن القمر مع كوكب زحل وكان ظاهر قريب جدًا من زحل فى الليلة دي، وظهر كمان كوكب المشترى بشكل واضح لحد بزوغ الفجر.
شهر يوليو مكمل معانا بظواهر فلكية جميلة زي مثلًا يوم الخميس الجاي هيقترن القمر مع كوكب الزهرة، وهيكون نجم الدبران أو عين الثور حاضر جمبهم فى منظر بديع بداية من حوالي الساعة 3 الفجر لحد بزوغ الفجر، والإثنين الجاي هو موعد ميلاد هلال شهر ذى الحجة، وهيتقابل الهلال الجديد مع كوكب زحل. والوقت ده هيكون أفضل وقت لتصوير كوكب زحل، وحلقاته، وأقماره الأربعة لأنه هيكون في وضع تقابل مع الشمس وأكثر إشراقًا من أي وقت تاني في السنة.
لو حابين تتابعوا الظواهر دي وتشغلوا نفسكوا بأنشطة جديدة ممتعة بعيد عن أي تقارب اجتماعي، تقدروا تشوفوا النجوم والكواكب بشكل واضح في الأماكن اللي مش زحمة بالأنوار وعواميد الإضاءة. فالمريخ وعطارد والزهرة مثلاً تقدروا تشوفوهم بوضوخ خلال فترة الفجر أو الغسق، وكواكب المشتري وزحل بيكونوا واضحين في السماء خلال فترة الفجر، والكواكب القريبة من الأرض ممكن تستمر مدة ظهورها لمدة أسابيع زي عطارد، وممكن كمان توصل للسنتين زي المريخ.