بواسطة فرح أشرف.
دار الأزياء الإسباني بوريفيكاسيون غارسيا -أو “Purificacion Garcia”- قرر يعمل تعاون إقليمي مع مصممة الأزياء السعودية نورة الشيخ.. و التعاون ده هيشمل اصدار عبايات للوطن العربي، ولكن تصميم العبايات هيكون مستوحى من تصاميم الحقائب والشنط اللي غارسيا بتنتجها.
تم اختيار نورة الشيخ من وسط مصممين عرب كتير وكان فكرة التعاون نابعة من دافع دعم المواهب الابداعية في العالم كله. نورة مشهورة بتصاميمها اللي بتدمج ما بين التراث السعودي والموضة العالمية. الفنانة الشابة بتصمم العبايات على حسب رغبة العملاء بس بتضيف لمساتها الخاصة اللي بتخلي كل موديل مختلف عن التاني والناتج النهائي بيكون أقرب لتحفة فنية مش مجرد عباية.
تم الاتفاق مع نورة علي اصدار عبايات مستوحاة من ثلاث حقائب مختلفة 360 وMi Primera Cita وHomenaje Acolchado. كل حقيبة ليها تصميم فريد و راقي و بالتالي كل عباية هتكون قطعة فريدة تشبه تصميم غارسيا.
تصميم Mi Primera Cita
التصميم ده من كلاسيكيات غارسيا، وبيتميز بخطوط متعرجة وده كان إلهام لنورة إنها تعمل العباية علي جانبها. الشنطة برضه فيها سلسلة لكتف ممكن تتعدل للطول اللي عايزينه والشنطة مصنوعة من جلد الكينوا.
الشنطة كلاسيك مصنوعة مخصوص لإبراز ثقة المرأة بنفسها وتعزيز كل قطعة في الطقم.
تصميم 360
360 هو تصميم لحقيبة متعددة الاستخدمات بتصميم هندسي عضوي بيجمع ما بين 3 قطع منفردة متشابكة مع بعضها وده كان تصميم جديد ومختلف في عالم الشنط. على نفس الجانب نورة عملت العباية من الساتان مدموجة بلونين مختلفين، أما الرقي والذوق الرفيع عند نورة لعب دوره فاختارت لونين وهما الاسود و البني.
تصميم Homenaje Acolchado
و ده كان آخر تصميم في التعاون، الشنطة مصنوعة من جلد نابا اللي غارسيا مشهور بيه. الشنطة بتتميز بأناقتها وبساطتها. نورة استمدت التصميم من حبة الكريستال اللي في الشنطة. أما قماش العباية فكان مزيج مابين التول والساتان بنفس لون الشنطة
التعاون كان مبهر و بيّن لنا قد إيه الوطن العربي فيه مواهب و فنانين شاطرين والكوليكشن كان مبهر و عليه ضغط كبير جدًا من سيدات الوطن العربي.
آخر كلمة: الكوليكشن كان راقي جدًا، عرفنا إيه رآيك؟
