في الفيديو ده، بتحكي لقاء الخميسي عن مشوارها السينمائي من بعد فيلم عسكر في المعسكر واللي لعبت فيه دور بنت صعيدية بسيطة (سعدية) بتحب عسكري صعيدي في الجيش (خضر، محمد هنيدي). وصرحت بتصريحات غريبة شوية.. أو غريبة كتير، واللي خلت السوشيال ميديا كلها تنتقدها، وفي اللي ماستوعبش هي ازاي قالت كده علني قدام الناس كلها، ويا ترى ردها هيكون إيه؟ هل اعتذار هيكون كافي على تصريحات زيّ اللي قالتها دي! تعالوا نشوف هي قالت إيه..
احنا مش بنشغل ناس سمر في السينما؟
على حسب كلام لقاء الخميسي في الفيديو؛ يمكن اللي عطل مشوارها الفني هو الشكل اللي طلعت بيه في الفيلم والناس افتكرت إنها “بالسمار” ده ووحشة فعلًا، وده اللي خسرها أدوار كتير في مشوارها الفني.
لقاء الخميسي بتتكلم بتلقائية بس ورا الكلام ده أزمة حقيقية
الحقيقة إن الفيديو ده بيلخص في 45 ثانية ثقافة العنصرية عند المصريين، سواء كان ظهور لقاء الخميسي ببشرة داكنة واللي بتعتبره شيء وحش أو ردة فعل المنتجين والمخرجين اللي على حسب كلامها تجاهلوها لفترة طويلة بعد فيلم عسكر في المعسكر بسبب اعتقادهم إن لون بشرتها الأسمر بيضيف عنصر غير جمالي على شكلها.