سقطرى: دليلك لزيارة واحدة من أغنى وأجمل جزر العالم

سقطرى.. جنة يمنية ولؤلؤة مطمورة، أطلقوا عليها الإغريق لقب “جزيرة السعادة”، جمالها كله بيكمن في إنها مكان طبيعي وعلى الفطرة، مافيهوش أي تدخل بشري، أو زيّ ما بيقولوا عليها “عذراء” أو” بكر”.

واحدة من أجمل جزر العالم وأكبرها حسب تصنيف مجلة (نيويورك)، طولها بيوصل لـ 125 كلم وعرضها بيوصل لـ 42 كلم، وأهميتها بترجع للعصر الحجري وقت اشتهار السلع المقدسة زيّ “اللبنان والبخور والصبار”، واصلة لمستوى فريد من التنوع الحيوي والبيولوجي والبيئي؛ من شواطئ خلابة ورمال ناعمة وشلالات وكهوف ومغارات، وموطن لأنواع نادرة من النباتات والأشجار اللي مش موجودة في أي حتة في العالم.

ده بجانب تصنيفها سنة 2008 كواحدة من مواقع التراث العالمي، كل ده يخلي ناس تقطع مسافات علشان تتعرف على الطبيعة وتعيش مغامراتها وخباياها، وعلشان كده عملنالك دليل للجزيرة هتعرف منه ممكن تزور إيه، والأنشطة اللي تتعمل هناك، وإيه اللي تاخده معاك، ومتوقع تلاقي إيه هناك.

إيه الأماكن اللي ممكن تزورها هناك؟

الشواطئ

زيارتك هتبقى ما بين جبال وشواطئ وكهوف ومغارات، ولإن عددها لا يمكن حصره، فهنقولك على أشهرها والأنشطة اللي ممكن تعملها هناك.

شاطئ قنسيلة

عن:travel

واحد من الشواطئ الأكتر شعبية في سقطرى، مكان مناسب للاسترخاء، متحاط بجبال من الأحجار الجيرية ورماله البيضة ومياهه الفيروزية النقية والمناسبة جدًا للغطس، هتلاقي فيه مجموعة من الأسماك الاستوائية اللي بتسبح بالقرب من سطح البحر والشعاب المرجانية، هتحس نفسك قدام لوحة مرسومة من درجات اللون الأزرق، ممكن تستعمل القارب أو تمشي لمسافات طويلة وتستمتع بالمناظر الطبيعية، متوسط درجة حرارة المياه في كل الشهور قريبة ومناسبة للغطس، والأيام المشمسة أكترها في شهر ديسمبر ويناير.

شاطئ الشعب

مناسب للعزلةوالاسترخاء، وممكن تمارس فيه أنشطة زيّ السباحة أو التسلق على الجبل المجاور للشاطئ، بس خلي بالك إن الشاطئ مافيهوش أي متاجر أو مطاعم؛ فجهز كل الحاجات اللي محتاجها معاك، وممكن كمان تمارس رياضة التزلج بأريحية على الرمال، وهتلاقي أعشاب وشجيرات ومساحات خضرا، والميزة كمان إن مياه الشاطئ دافية وتقريبًا مافيهوش أمواج ونادرًا ما تلاقي رياح، بجانب إنك هتلاقي أماكن ظل، والوقت المناسب للزيارة من سبتمبر لأكتوبر.

شاطئ ديليشا

عن:scortoo

موجود على الساحل الشمالي للجزيرة نفسها، بيتميز بالكثبان الرملية البيضاء الكبيرة اللي بتطل على مياه البحر، هتلاقي في الشاطئ مجموعة من الأكواخ، ومطعم صغير متخصص في الطعام المحلي، وتقدر كمان تمارس رياضة ركوب الأمواج، وهتلاقي مجموعة من القوارب تقدر تروح بهم رحلات بحرية، بس يمكن العيب اللي فيه إنك مش هتلاقي أماكن ظل، وبالنسبة لدرجة حرارة المياة مش بتزيد عن 30 على مدار شهور السنة.

لو حابب تصطاد بقى، في مجموعة من قرى الصيد في الجزيرة موجودة على طول الشواطئ دي، وسكانها لسه بيصطادوا بالطرق البسيطة.

المغارات والكهوف

في أكتر من 52 كهف ومغارة متوزعين على مناطق كتير في الجزيرة، ناتجين عن عوامل تعرية، ومعظم الكهوف مأهولة بالسكان لإن ده نمط الحياة هناك.

كهف حوق

عن: scotra

لحد دلوقتي مساحته الإجمالية مجهولة، وبيعتبر واحد من الغرائب الطبيعة في العالم لرسوماته ونقوشه التاريخية وزخارفه، هتلاقي أكتر من 200 نقش من الطباشير والفحم والطين، ونصوص مكتوبة، ويقال إنهم استخدموه قبل كده كمعبد لممارسة الطقوس الدينية، الكهف من جوا بارد نوعًا ما، سهل دخوله بس هتحتاج لمرشد محلي وماتنساش وسيلة للإنارة، وممكن تاخد 40 دقيقة علشان توصل لنهايته.

هضبة ديكسام

موطن لأشجار دم التنين، هتلاقي هناك فرصة إنك تشتري “دم التنين” نفسه المستخرج من الشجرة، واللي بيعتبر مقوي للمناعة ومعالج للجروح، ده غير إنها موطن للبدو المحليين، محاطة كلها بسلاسل جبلية وهتقدر تشوف من خلالها إطلات مميزة على وادي درهور، أفضل وقت تروح هناك بعد الظهر، بس ماننصحش إنك تخيم هناك علشان الجو بالليل بيبقى عاصف.

لو بتفضل رياضة المشي، تقدر تعملها وسط الكهوف والأودية والأخاديد، وفي أماكن مخصصة لركوب العجل، وننصحك ماتفوتش متعة التسلق هناك، وفي كمان جولات للجمال تقدر تأجر جمل وتتحرك بسهولة لو حابب تشوف التضاريس الطبيعية وتسمتع بغروب الشمس.

تأمل أندر النباتات والأشجار والطيور

عن: cnn

في على الجزيرة 850 نوع نبات، منها 270 نوع مش موجود في أي مكان في العالم، وفي 10 أنواع من النباتات النادرة والمهددة بالانقراض، من ضمنهم شجرة “دم الأخوين” المعروفة بحكايتها الأسطورية اللي بتقول إنها نبتت من دم الأخوين “قابيل وهابيل” لما وقعت أول جريمة عرفتها التاريخ، هتلاقي برضه هناك “شجرة الزجاجة” والمعروفة بسماكة جذعها اللي شبه الزجاجة. 

وبجانب النباتات والأشجار، هتلاقي مجموعة من الطيور النادرة؛ زي الصقر الحوام السقطري، وطائر السوادية الإفريقية، وطائر الجشنة، وطائر الهازجة، وطائر المغرد السقطري، وغراب البحر السقطري، وعصفور الشوك العربي، واطمن مافيش أي حيوانات مفترسة هناك، بس ده مايمنعش إنك ممكن تلاقي سحالي وتعابيين وعقارب.

الوقت المناسب للسفر

عن:tavel

المدة اللي هتحتاجها علشان تزور كل الأماكن ممكن تاخد من أسبوع لأسبوعين، والجزيرة لها موسم سياحي بتروحه فيه وهو فصل “الشتا” من نوفمبر لفبراير، لإن 5 و6 بيبقى الجو صعب وممكن ماتعرفش تستمتع، والأحسن شهر 12 وشهر 1 وشهر 2 مناسب للأنشطة البحرية.

تروح ازاي هناك؟

لو أنت في اليمن، ففي رحلة واحدة بتطلع كل أسبوع من المطار اليمني، وفي رحلات بحرية، بس الرحالة عز الدين عارف مش بينصح بها، لإنها مش منتظمة وفيها مخاطرة علشان في الغالب بتبقى رحلات شحن بضائع، ولكن لو حابب تروح هتلاقيها في مدينة المكلا الساحلية اليمنية، بتروح موانئ المكلا والرحلة بتاخد من يومين لتلات أيام.

لو أنت برا اليمن فالمجال الجوي هو الخيار الأفضل، سواء رايح من القاهرة أو أبو ظبي أو أي دولة عربية، بتاخد طيارة لمدينة سيئون في عدن ومن هناك طيارة للجزيرة، لكن من 2021 الإمارات عملت رحلات مباشرة من دبي للجزيرة يعني مش محتاج تنزل ترانزيت لمدينة سيئون.

إيه اللي تبقى مستعد له هناك؟

بناء على كلام الرحالة اليمني عز الدين عارف، إن في مدينة صغيرة في سقطرى اسمها “حديبو” هي اللي فيها إمكانيات، بس بعيدة عن الأماكن اللي أنت عايز تزورها، فأغلب الأيام هتبقى تخييم في الأماكن اللي هتزورها، وبيقول إن لازم تستعد لإن المواد الغذائية قليلة والبقالات صغيرة، فلازم تجيب معاك احتياجاتك.

الشبكة في المواقع السياحية صعب تحصيلها ففي الغالب مش هيبقى في إنترنت، إلا في بعض المناطق في مدينة حديبو، ويفضل إنك تشتري مياه معدنية معبأة.

تاخد إيه معاك؟

عن:travel

ملابس مريحة وواقية ضد المطر وشنطة نوم وحاجات تقيلة بالليل في فصل الشتا، وهتحتاج للمشي على المرتفعات أحذية مريحة، وواقي شمس وبطاريات احتياطي للكاميرا اللي هتسجل بها كل لحظاتك، بجانب الحاجات الشخصية، ولو في أدوية متعود تاخدها.

وبالنسبة للانتقال بين الأماكن السياحية، فمحتاج سيارة دفع رباعي، ودي بالاتفاق مع مكتب في اليمن بيتكفل من وقت وصولك لسقطرى وبيوفروا لك برنامج الرحلة، واللي من ضمنها طباخ يمني بيطبخ لك على الطريقة اليمنية بالمعدات البسيطة.

آخر كلمة: ماتفوتوش قراءة: مشاهدة الطيور: اهتمام مصري بنوع مميز من السياحة

تعليقات
Loading...