تطورات أسعار الدولار مقابل الجنيه المصري في آخر يومين
من امبارح، الأخبار وحتى الصفحات على السوشيال ميديا مش بتناقش أي حاجة غير سعر الدولار النهارده مقابل الجنيه المصري، الناس لاحظت تفاوت كبير في سعر الدولار، وكل ريفرش للصفحة بتزيد فيها قيمته، وعلى آخر اليوم، لما كسر حاجز الـ 31 جنيه، ابتدت الناس تلاحظ انخفاض في سعره وصل لـ 29 جنيه، وكل ده في خلال ساعات معدودة.
النهارده الصبح الناس صحيت على إنه ارتفع مرة تانية وكسر حاجز الـ 30 جنيه، ودلوقتي حالًا أثناء كتابة المقال، سعره 29.55. ده طبعًا فتح مجالات كتير للمناقشة، عن تحرير سعر الصرف وتعويم الجنيه اللي ممكن ينتهي بارتفاع سعره فوق المتوقع، أو انخفاضه.
وضمن مساعي البنك المركزي، قرر مؤخًرا رفع أسعار الفائدة 300 نقطة أساس بالتزامن مع السماح للجنيه بالانخفاض مقابل الدولار، بعدها جت قرارات بنكي الأهلي ومصر الحكوميين بطرح شهادات ادخار لمدة سنة بعائد 25%.
من مارس 2022، بدأ البنك المركزي المصري يتحرك بشكل مكثف لاحتواء أزمة شح الدولار، وفي سبيل تضييق الفجوة بين أسعار صرف الدولار في السوق الرسمية والسوق السوداء، أعلن عن 3 تخفيضات كبيرة في قيمة العملة المصرية مقابل الدولار الأمريكي.
وبداية التحركات كانت خلال الاجتماع الاستثنائي اللي عقده في 19 مارس، لما تم إعلان السماح بارتفاع سعر صرف الدولار من مستوى 15.77 جنيه لحوالي 19.64 جنيه، علشان يسجل الدولار الأميركي مكاسب نسبتها 24.5%.