فرح عوض الله، لاعبة رياضة ركوب الخيل، كونت أول فريق لرياضة البولو للنساء في مصر. والفريق المكون من 10 عضوات، اسمه فريق “نفرتيتي”، وقالت فرح إنها شكلت الفريق لأنه ماكانش في أي فريق بولو للسيدات في مصر، وحست إن النساء محتاجين للتمثيل في ألعاب رياضية أكتر.
وعلشان تشكل الفريق، تواصلت فرح مع لاعبات من أندية فروسية في القاهرة، زي سلمي أيمن، ومارجريت فيشر، وحنان بدر، وهيا مجدي، وشجعتهم على الانضمام ليها، وعملت حساب على موقع انسجرام، اسمه nefertitipolo لنشر الفكرة، وتشجيع نساء أكتر على تعلم الرياضة، والانضمام ليهم. وبعد ما كونت فرح الفريق، تواصلت مع المجلس القومي للمرأة علشان تعرفهم على الخطوة الكبيرة دي، ورئيسة المجلس عبرت عن دعمها، وتشجيعها ليهم، وقد إيه هي فخورة بالإنجاز ده.
وفي 29 مارس، الاتحاد المصري للبولو، اللي اتأسس سنة 1980، نظم أول ماتش بولو للنساء، ولعب أعضاء فريق نفرتيتي ضد فريق نسائي تاني زي نادي اتحاد الشرطة في القاهرة، والفرق المختلفة بيتدربوا في أنديتهم، وبيتجمعوا كل يوم جمعة في ملاعب سقارة للعب.
الفُرس هم اللي ابتكروا لعبة البولو، وانتشرت في الهند، والصين، واليابان، ونقل المغول اللعبة للشرق، واتعرفت في مصر في عهد المماليك. وهي لعبة بتشبه رياضة كرة المضرب، بس الكرة بتتدحرج على الأرض بدل ما تطير في الهواء، وبنضرب الكرة بالعكس.
ففي كرة المضرب، بنضرب الكرة بطريقة عالية، بس في البولو، بنضرب الكرة بطريقة سفلية، والبولو بتتلعب أثناء امتطاء الخيول اللي بيسموهم “بوني”، والخيل لازم يتغير بعد كل شوط، ومابيلعبش أكتر من شوطين في الماتش كله اللي مكون من 5 أو 6 أشواط، ومدة كل شوط 7 دقائق ونص، وكل فريق مكون من 4 لاعبين. ومن الأدوات اللي بنستخدمها في رياضة البولو، الخوذة، والقفازات لحماية اليد، وواقي للركبة، والكرة المصنوعة من الخشب، وعصاية طويلة.