هيبدأ العد التنازلي لانطلاق موسم الرياض 2021 واللي بقى تريند على جوجل من وقت ما أعلن تركي آل شيخ عن تفاصيله، وهيشهد فعاليات واحتفاليات وعروض مسرحية وغنائية مختلفة بشكل هيعمل طفرة حقيقية على مستوى الترفيه في السعودية.
من المقرر إن الموسم السنة دي يضم 7500 فاعلية من بينها 70 حفلة غنائية عربية و10 معارض عالمية، و6 حفلات غنائية عالمية، ده غير 350 عرض مسرحي و6 مسرحيات عالمية و18 مسرحية عربية، ده غير بطولة واحدة للمصارعة الحرة ومباراتين عالميتين، وهيبقى في 200 مطعم و70 مقهى.
كل الفعاليات دي هتتعمل على مساحة تصل لـ5 مليون متر مربع وأكتر من 14 منطقة، وده اللي أعلنت عنه هيئة الترفيه السعودية تحت شعار #تخيل_أكتر
مسيرة الافتتاح هتبقى أكبر مسيرة استعراضية في المملكة وأكتر من 1500 مؤدي لها بأزياء تنكرية، ده غير العروض النارية وعرض دبابات هارلي، وأكتر من 2500 درون علشان ماحدش يفوته حاجة.
ومن ضمن جدول الفعاليات: انطلاق مهرجان Rush للألعاب الإلكترونية وعرض مسرحية سلام مربع و حفلة للأوركسترا المصرية وحفلة جورج وسوف ووائل جسار، ومباراة بين نجوم الهلال وفريق باريس سان جيرمان مع نجومه زيّ ميسي ونيمار، وفاعلية Winter Wonder Land للأطفال.
طب الحجز بيبقى ازاي؟ هتنزل تطبيق موسم الرياض وهتلاقي جدول بكل الفعاليات ومواعيدها، وهتختار الفاعلية أوالحفلة اللي عايز تحضرها وتحجزها وهتسدد قيمة التذكرة عن طريق نظام الدفع السريع.
تخيل أكثر .. وتعدى خيالك، في #موسم_الرياض ❤️🇸🇦pic.twitter.com/tnMwyXb6w8
— موسم الرياض | Riyadh Season (@RiyadhSeason) October 4, 2021
موسم الرياض من ضمن أهدافه إنه بيسعى إن السعودية تبقى وجهة ترفيهية سياحية تنافس الوجهات العالمية، وتكسر الصورة النمطية اللي كانت متاخده عنها زمان.