انتشرت على السوشيال ميديا صور دعايا وإعلان فيلم (الملكة كليوباترا) اللي من إنتاج الممثلة الأمريكية جادا بينكيت سميث، وبتستعد منصة (نتفليكس) لطرحه في شهر مايو الجاي. والإعلان أثار موجة من الجدل بسبب اختيار البطلة اللي بتؤدي دور الملكة كليوباترا.
المتخصصين في الآثار أعلنوا عن غضبهم بسبب اختيار البطلة ببشرة سمراء، غير إن ملامحها إفريقية وليست مصرية، واعتبروا إن ده يعتبر دعم لحركة الـ (أفروسنتريك) أو (حركة المركزية الإفريقية) المتعصبة للعرق الأسود، واللي بتزعم إن الحضارة المصرية أصلها إفريقي، وناس كتير قالت إن دي محاولة لسرقة تاريخ مصر وحضارتها ونسبها لحضارات أخرى.
مجدي شاكر، كبير الأثريين بوزارة الآثار، قال: “لا بد أن يقف كل المصريين ضد هذا الأمر، وضد هذه المنصة غير المسؤولة”.
وانتشرت آراء ناس كتير بتقول إن ماينفعش في فيلم وثائقي معمول عن الملكة كليوباترا، يختاروا بطلة بمواصفات مختلفة عن الشخصية الحقيقية، لإنه حتى مش فيلم بيتناول سياق درامي معين ممكن بشكل ما يختلف فيه ملامح ووجه البطلة، لأ ده عمل وثائقي عن حياة الملكة ومفروض ينقل القصة الحقيقية بملامحها مظبوطة.