بنحب دايمًا نسلط الضوء على الأعمال والممثلين اللي بتلمع برا حدود الوطن العربي من خلال مشاركتهم في أفلام عالمية، وكان آخرهم الفنان عمرو جمال، اللي انتهى من تصوير مشاهده في الفيلم العالمي يوم جمعة الحيوان (Day of Friday the Animal).
الفيلم من إنتاج مصري عالمي، بيشارك فيه مجموعة كبيرة من الفنانين من جنسيات مختلفة، وبيلعب عمرو فيه دور البطولة. اتكلمنا مع عمرو جمال علشان نعرف تفاصيل أكتر منه وحكى لنا عن مشاركته في الفيلم وعن الكواليس.
الفيلم بينتمي لنوعية التشويق والإثارة، وأخد منهم سنين علشان يظهر للنور، ده اللي قاله عمرو جمال وهو بيحكي عن دوره وازاي وقع الاختيار عليه، وقال إنه تم اختياره للمشاركة في الفيلم عن طريق مخرج العمل أسيوطي اللي عايش برا مصر، وبيشارك في العمل مجموعة كبيرة من الممثلين من كل حتة في العالم؛ منهم رأفت البيومي وعلي صبحي وهاني طاهر من مصر، ونبيل رافع من المغرب، وأرمين سياميا من البوسنة والهرسك، وكلارا موتشي من كرواتيا، وضيوف الشرف أحمد كمال وأحمد داش وهاني خليفة، ومصممة الأزياء ألكسندرا لوفريتش من الماركة المستدامة (نو نيشين فاشون).
عن قصة الفيلم، بيقوم عمرو بدور البطولة في دور “الراوي” اللي بيحكي على لسانه قصة شخص بيقرر الهروب من السجن، ولما بيهرب بيعمل خمس جرائم في يوم واحد، بتصنف كأعمال إرهابية بتمس مصالح أجنبية، وهيعيش في مطاردة مع السلطات الأجنبية.
الفيلم اتصور في أماكن كتير من ضمنهم سراييفو في البوسنة والهرسك، وقال لنا عمرو إنها من الأماكن اللي مش هيقدر ينساها لجمالها وصعوبة أجوائها ودرجة حرارتها اللي أحيانًا كانت تحت الصفر، وختم كلامه بإن الموضوع كان كله تحدي في تحدي، وتجربة جديدة مع الفريق اللي متجمع من كذا ثقافة وبلد.
من جانب تاني، هنشوف عمرو جمال السنة دي في موسم رمضان من خلال مشاركته في مسلسل كامل العدد، بطولة دينا الشربيني وشرف سلامة وإسعاد يونس ومجموعة كبيرة من الفنانين.