شهر رمضان له طقوسه وعاداته، اللي من أهمها الجانب الروحاني والديني، كله بيحرص في الشهر الكريم إنه يتقرب لله بصورة معينة، في اللي بياخد معلوماته الدينية من البرامج، وفي اللي بيتدبر في القرآن، وفي اللي بيدور عليها من خلال الكتب الدينية، وبيلاقي فيها وسيلة علشان يسد بها الفجوة بين المعلومات اللي عنده وبين التطبيق الفعلي.
باقة الكتب المختارة النهارده هتجمع ما بين العلم والمعاني الطيبة اللي هتقدمها لك، والسلوكيات الجديدة اللي هتتعلمها بأسلوب سلس وبسيط.
لأنك الله – علي الفيفي
“في كل لحظات حياتك أنت بحاجة إليه، فإن لم ترجع إليه اختيارًا رجعت إليه اضطرارًا” للكاتب علي الفيفي.
كتاب هياخدك في رحلة للتعرف على الله سبحانه وتعالى ودلالات وجوده، من خلال شرح أسمائه الحسنى بطريقة جذابة ومبسطة.
كتاب هيعلمك اليقين بقدرة الله عن طريق القلب والعقل، مش بس كلام مرسل، بجانب إنه بيقدم عدد من القصص الملهمة بتفسر معنى كل اسم لأسماء الله.
خدعوك فقالوا – مصطفى حسني
“لا تتوقع الرسائل الملائكية من البشر” للداعية مصطفى حسني.
الكتاب بيناقش فكرة تصحيح المفاهيم الخاطئة بمفهوم “التخلية قبل التحلية” بمعنى إننا نهدم الغلط الأول وبعدين نبدأ في الصح، وبيتكلم عن الفرق ما بين اللي مقتنع به المسلم وما بين اللي بينفذه. بيغوص الكتاب في المفاهيم الذاتية اللي اتشكلت عند الإنسان، واللي في منها اتشكل بصورة غلط من خلال المجتمع اللي حواليه؛ زي “اضرب اللي ضربك” أو “الدين هو الصلاة والصوم بس”.
الكتاب أسلوبه سهل وبسيط ومناسب كمان لفئة المراهقين، بجانب إنه مستعين بدراسات في مجال علم النفس وتطوير الذات.
فاتتني صلاة – إسلام جمال
عن:خير جليس
“لا تجتهد لتصلي بل اجتهد لتتعرف على الله لتشتاق للصلاة” للكاتب إسلام جمال.
بيتناول مشكلة عدم الالتزام بالصلاة في مجتمعنا، ولكن بمنظور بسيط ومش معقد علشان يوصل به للشريحة المستهدفة، الكتاب بيبدأ من أصل المشكلة وبيطرح الأسباب اللي بتؤدي لتفويت أو التكاسل عن الصلاة، وبيمهدلك الطريق علشان تاخدها من باب إنها راحة لنا مش مجرد فرض بتأديه وتحسه إنه تقيل على قلبك.
هيوضح الكاتب فكرته من خلال مناقشة الأفكار اللي بتدور في دماغك، هيفتح حوار معاك وهيديلك أسباب وبرهان ليه احنا محتاجين الصلاة، بجانب قصص ملهمة وازاي بخطوات تتجنب الكسل والتسويف وتجاهد نفسك.
أثر النبي – عمر طاهر
“كانت تعرف أن ميلاد الحزن مجرد عد تنازلى لميلاد الفرح” من أقوال الحفيدة إمامة بنت زينب.
أثر النبي للكاتب عمر طاهر بيضم 12 شخصية من السيرة النبوية، من اللي كانوا حول الرسول من آل بيت النبي، وبيتكلم عن أثر النبي محمد عليه الصلاة والسلام في حياة كل شخصية فيهم، الشخصيات ممكن تكون عارفها بس الكتاب بيتناول القصص من زاوية مختلفة، جوانب إنسانية وقصص حب من منظور ديني بعيدة عن الحروب والصراعات.
هتستمتع مع أسلوب عمر طاهر في السرد، وهيخليك تبتسم وأنت بتقرأ القصص لسلاسته وعفويته، من ضمن القصص هتلاقي قصة زينب بنت الرسول، قلبك هيترعش وأنت بتقرأها مع دموعها على زوجها المشرك اللي خافت إنه يقع أسير للمسلمين، القصة هتوريك جانب إنساني من تضحية النبي وشفاعته على واحد من كفار قريش.
قصص الحيوان في القرآن – أحمد بهجت
“من عجائب الحب المبدئية أنك لا تعرف لماذا أحببت، ثم يزيد حبك فتعرف لماذا زاد، ويظل السبب الرئيسي للوقوع في الحب سرًا غامضًا لا يكشف عن ملامحه قط” للكاتب أحمد بهجت.
قدم الكاتب بين صفحات كتابه خلاصة تجربته ودراسته في العلم والدين مع جزء من الخيال والإبداع، كتاب خطط له لسنين بعد دراسته لسلوك الحيوان، على سبيل المثال علشان يكتب قصة سيدنا يونس مع الحوت، قرأ 20 كتاب علشان يفهم عملية التمثيل الغذائي ويستوعب ازاي الحوت ابتلع سيدنا يونس من غير ما يسبب له ضرر.
ميزة الكتاب إنه ماكانش رصد لأدوار الحيوانات زي ما اتذكروا في القرآن الكريم، ولكن الكاتب أضاف للقصة وجهة نظر الحيوان كإنه شخص بتسمع له وبيسمع لك، هتتعاطف معاه وتضحك معاه، وهيخليك تكتشف براءة الحيوان في كل قصة.
هتلاقي بين طيات كل كتاب وقصة بيسطرها، كتير من المعاني الدينية الطيبة، اللي هتساعدك على تأدية شعائر رمضان بإخلاص وحب، وهتزود من الجرعات الروحانية.