خلال الكام سنة اللي فاتت، بدأ الكلام عن اضطراب ثنائي القطب من خلال منصات التواصل الاجتماعي العربية، وكان الاضطراب النفسي المعروف على مستوى العالم، بيتقدم لمعظم الجمهور العربي للمرة الأولى.
وزيّ أي تشخيص جديد سواء نفسي أو سلوكي أو جسدي، لما بيعرف الناس عنه بتبدأ أعداد الناس اللي بتتشخص به تزيد، لإن ناس كتير منهم أكيد عانت من الاضطراب وماعرفتش إيه المشكلة، لإن ماكانش عندهم فكرة عنه.
علشان كده المتشخصين بالاضطراب بيتعرضوا لبعض الانتقادات في معظم المجتمعات، وبيوصف البعض اضطراب ثنائي القطب بالتريند.
إيه هو اضطراب ثنائي القطب؟
بيوضح موقع وزارة الصحة إن اضطراب ثنائي القطب حالة منتشرة لحدٍ ما، وبيتشخص واحد من كل 100 شخص في مرحلة من حياتهم بها.
بيعرف الموقع اضطراب ثنائي القطب بإنه اضطرابات في الدماغ بتسبب تغيرات في مزاج الشخص وطاقته وقدرته على العمل، وبيوضح إنها حالة من حالات الصحة العقلية اللي بتؤثر في الحالة المزاجية، وفيها بيتبدل المزاج بين المرتفع جدًا (الهوس) والمنخفض جدًا (الاكتئاب)، وبيمر المريض بفترات بيكون فيها مزاجه طبيعي.
نوبات الهوس والاكتئاب ممكن تستمر لأسابيع أو شهور، وبتسببها الظروف أو المواقف اللي فيها ضغط، واللي بتحفز أعراض الاضطراب بشكل أكبر.
لحد النهارده، مانعرفش إيه سبب ظهور الاضطراب بالظبط، ولكن يُعتقد إنه مرض وراثي، وكمان في أسباب بيئية واجتماعية ممكن تساعد على ظهوره.
ازاي تعرف إن عندك اضطراب ثنائي القطب؟
زيّ ما قلنا، المريض بيمر بحالات مزاجية متقلبة ما بين هوس شديد واكتئاب، وفي مرات تانية بيكون المزاج خليط ما بين الهوس والاكتئاب.
وبيوضح موقع وزارة الصحة أعراض مرحلة الاكتئاب، وهي إن المريض يكون حاسس بحزن ويأس أو انفعال طول الوقت، وطاقته قليلة ومش قادر يركز، كمان بيحس بفراغ وفقدان الاهتمام في النشاطات اللي بيعملها كل يوم.
والإحساس بالذنب واليأس والتشاؤم وعدم الثقة بالنفس، وكمان بيمر المريض بهلوسات وتفكير مش منطقي وصعوبة في النوم، وبيكون مش قادر ياكل وعنده أفكار انتحارية.
أما مرحلة الهوس، فبيمر فيها المريض بإحساس بالسعادة الشديدة وطاقة عالية وثقة في النفس وهلوسة وتفكير مش منطقي والكلام بسرعة.
لو بتمر بالأعراض دي، فاحتمال يكون عندك اضطراب ثنائي القطب، وساعتها لازم تشوف دكتور، بالذات لو بدأت تفكر في الانتحار، أو لو كنت اتشخصت بالاضطراب قبل كده ومريت بمرحلة علاج وبعدين رجعت الأعراض مرة تانية.
التشخيص والعلاج
لو حسيت إن عندك أعراض اضطراب ثنائي القطب، لازم تشوف طبيب نفسي متخصص علشان يشخصك بشكل صح، وبنأكد إن الطبيب هو الشخص الوحيد اللي يقدر يعرف حالتك ويوصف علاج معين.
عمومًا، الهدف من أي علاج متوفر النهارده للحالة دي هو السيطرة على الأعراض وتقليلها، علشان يقدر المريض يعيش حياة طبيعية لحد كبير.
ومتابعة الجلسات النفسية مع الطبيب مع الأدوية، بيساعد المريض على التأقلم مع الاضطراب والتحكم في أعراضه، وتقليلها بشكل كبير.