الناس بتتكلم عن مسلسل (علاقة مشروعة) في السباق الرمضاني وخصوصًا بعد أول أسبوع من رمضان، ومع عرض أشهر المشاهد من حلقات المسلسل على السوشيال ميديا، لاحظنا إن ناس كتير بتتساءل: “هي فين العلاقات المشروعة؟” لإن اللي ظاهر من المسلسل لحد دلوقتي كلها علاقات غير مشروعة وخيانات وطعنات.
أشهر مشهد من المسلسل لحد دلوقتي كان مشهد الفنان ياسر جلال وهو مستخبي ورا باب الأوضة لما جوز الفنانة مي عمر جيه فجأة، والحوار السيريالي بين الفنانة وجوزها في المسلسل اللي اتقال فيه: “انتي في حد معاكي جوا؟” وردت الفنانة: “إيه اللي انت بتقوله ده؟ أنت بتشك فيا؟ أنت ازاي تحسسني الإحساس ده؟”.
طبعًا الناس على السوشيال ميديا ماسكتتش، وقارنوا اللي بيحصل في الحلقات ده باسم المسلسل، ومش لاقيين فيه علاقة مشروعة واحدة لحد دلوقتي برغم إن عدى أسبوع من رمضان، وإن كل الناس اللي ماينفعش يحبوا بعض في المسلسل طالعين بيحبوا بعض، حد فاهم حاجة؟
من أول حلقة كانت الصدمة، وهي إن ياسر جلال بيحاول يرجّع مي عمر لجوزها مراد مكرم في المسلسل، والناس كانت فاكراه راجل طيب وبيحب يعمل خير ويصلح بين الناس، لحد ما اكتشفنا إن مي عمر في المسلسل حامل من ياسر جلال وبيحاولوا يداروا على علاقتهم.
ده غير التعليقات اللي قالت عن الملسلسل بإنه العشق الممنوع، وناس قالت إن المسلسل فكرته وأحداثه تقليد لمسلسل أزمة منتصف العمر، لكن الفنانة مي عمر ردت على الاتهامات دي على صفحتها وقالت إن مسلسلها مالوش أي علاقة بالمسلسلات دي.
كلنا مستنيين الحكمة من تسمية المسلسل “علاقة مشروعة” علشان أكيد في مفاجأة مستنيانا على مدار باقي الحلقات، ومتحمسين نعرف القصة هتوصل لإيه.. تفتكروا مين اللي هتكون علاقتهم “علاقة مشروعة”؟