في أول السنة دي وبسبب انتشار فيروس كورونا، تم غلق دار المناسبات لفترة مش قليلة، وحتى بعد ما تم فتحها من تاني، كان في قيود كتير زيّ تقليل عدد المعازيم وإنه يكون الفرح أو الخطوبة في مكان مفتوح مش في القاعات اللي إحنا متعودين عليها.. بس هل ده وقف قدام الحب الحقيقي ورغبة اجتماع شخصين مع بعض؟ أكيد لأ! فالسنة دي على قد ما كانت صعبة على قد ما كانت مفاجأة لينا كلنا، من كم الجوازات والخطوبات اللي شوفناها من النجوم اللي أعلنوا عن ارتباطهم.. في اللي احتفل في نطاق ضيق في البيت وبين الأصحاب، وفي اللي احتفل زيّ ما بيقولوا على أكمل وجه! فتعالوا نفتكر مع بعض مين الكابلز اللي فرحونا بيهم السنة دي..
ياسمين عبد العزيز وأحمد العوضي
في الأول كان في إشاعات حول ارتباط الفنانة ياسمين عبد العزيز والفنان أحمد العوضي، ولكن ماكنوش طلعوا أكدوا أو نفوا الخبر، ولكن بعد فترة وبطريقة لا يشملها إقامة فرح أو خطوبة، أعلن الاتنين ارتبطهم رسميًا بأكتر طريقة لطيفة ممكنة، وهو نشر الاتنين نفس الصورة على حساباتهم الشخصية على انستجرام، وكتبوا “بحبك يا ياسمين” و “بحبك يا أحمد”…
ياسمين صبري وأحمد أبو هشيمة
في شهر أبريل، أعلنت الفنانة ياسمين صبري من خلال صفحاتها على مواقع التواصل الاجتماعي، عقد قرآنها على رجل الأعمال المعروف أحمد أبو هشيمة.. واحتفلوا الزوجين في نطاق ضيق وفي جو عائلي بسيط بسبب ارتفاع حالات الكورونا وتطبيق الإجراءات الاحترازية وقتها.
أمينة خليل وعمر طه
ومن النجوم اللي فجأتنا بارتباطهم السنة دي، الفنانة أمينة خليل لما نشرت صورة من خطوبتها اللي تمت في البيت على رجل الأعمال المصري عمر طه، وبعدها احتفل العروسين في أحد الأماكن الساحلية بحضور بعض من الأصدقاء.
هند عبد الحليم وكريم قنديل
احتفلت الفنانة هند بخطوبتها وبعدها بوقت قليل بزواجها من المهندس كريم قنديل في شهر أغسطس، والكل وقتها اتكلم عن جمال فستان الفرح والاحتفال اللي حضروا مجموعة من فنانين وفنانات الوسط الفني، منهم الفنانة دُرة.
دُرة وهاني سعد
طبعًا كلنا حضرنا وشوفنا أخبار مختلفة عن فرح دُرة، فالأول الكل اتكلم عن جمال فستان دُرة (كالعادة) وبعدين حصل شد وجذب كده بسبب اعتقاد البعض إنها اتجوزت رجل متزوج وإنها كده بتخالف القانون التونسي، ولكن في النهاية نفت دُرة كل ده وأكدت إنها ماعملتش حاجة تخالف القانون التونسي ولا بتأذي حقوق المرأة.. ومتبقاش غير جمال شكلها في الفرح وسعادتها مع زوجها.
هنادي مهنا وأحمد خالد صالح
في احتفال راقي وهاديء، احتفلت الفنانة هنادي مهنا بزواجها من الفنان أحمد خالد صالح، وشوفنا كلنا الصور الرومانسية والجميلة بين العروسين، وكمان اتأثرنا ببكاء والد هنادي، هاني مهنا أثناء الفرح.. وبرغم المشاكل اللي حصلت بعدها بين والدها ومطربين المهرجانات بعدها، إلا إن الموضوع اتحل بسرعة ومتبقاش غير الفرحة بالزوجين اللي خدوا الضوء!
ميرنا الهلباوي ومحمد عطيا
بطريقة غير تقليدية على الإطلاق احتفلت الكاتبة والانفلونسر ميرنا الهلباوي بخطوبتها من الفنان محمد عطية من خلال جلسة تصوير عتيقة أو “vintage”.. ولفترة طويلة استمرت علاقتهم الكل بيتكلم عليها وبقت تريندج بسبب الكلام اللي قالته ميرنا عن علاقتها بمحمد وقد إيه هو مثال يحتذي بيه للرجل المثالي في العلاقة العاطفية.
بشرى وسالم هيكل
بطريقة رومانسية، شوفنا إزاي رجل الأعمال سالم هيكل اتقدم لبشرى في ختام مهرجان الجونة، وبعد فترة اتخطبوا في نطاق ضيق جمع الأصدقاء المقربين والأهل.
آخر كلمة: ألف مبروك لكل النجوم، وبنتمنى ليهم السعادة الدائمة!