يوم الجمعة، تم عرس الفنان أحمد خالد صالح على الفنانة هنادي مهنا، وسط أجواء جميلة ومؤثرة، فشوفنا كلنا اللحظات الرومانسية اللي جمعت بين العروسين، وكمان شوفنا إطلالة هنادي في يوم الزفاف وقد إيه كان فستانها جميل ومميز، وحضر كتير من الفنانين والفنانات وكمان مطربين زيّ حمو بيكا وعمر كمال اللي أحييوا الفرح وخلوا الكل يقوم من على الكرسي.
ولكن كالعادة، اللحظات السعيدة مينفعش تخلو من الجدل اللي بيحصل، فبعد الفرح حصل جدل على حمو بيكا وعمر كمال، لما طلع الموسيقار هاني مهنا ونفى إنه دعا مطربي المهرجانات الشعبية حمو بيكا، وحسن شاكوش، وعمر كمال، لفرح بنته هنادي وقال “ماكنش ينفع أنزلهم من المسرح ووالله ما سلمت عليهم.”، ولكن ده ميلغيش إنه إتفاجيء بوجودهم وماكنش عايزهم.
ورد حمو بيكا وعمر كمال على تصريحات هاني مهنا، وقالوا إن هنادي هي اللي عزمتهم، وكتب عمر على صفحته على فيسبوك، وأكد إنه تم دعوتهم من هنادي، وإنهم ناس بيفهموا في الذوق وعمرهم ما كانوا هيحضروا فرح وكمان يغنوا فيه من غير دعوة، لكنهم حضروا زيّ أي فنان حب يفرحهم ويباركلهم.
وحسمت هنادي الجدل، لما نشرت فيديوهات على صفحتها على فيسبوك، وأكدت إنها بالفعل عزمت عمر كمال، وكلمت كمان حمو بيكا وحسن شاكوش، لكنهم مردوش، وعزمهم عمر كمال كمفاجأة على الفرح.. وإنها عزمتهم لحبها وحب الجميع ليهم ولأغانيهم اللي بتضيف البهجة والسرور.