بعد الحدث العظيم اللي أبهر العالم كله بإيد مصرية، موكب المومياوات الملكية، عندنا فرصة إننا نشوف حدث بنفس الأهمية والجمال مرة تانية، باستغلال لأهمية وعظمة الحضارة المصرية القديمة وآثارها، وللمشوار اللي بيكمله أحفاد أعظم حضارة عرفها التاريخ من خلال فكر جديد لمتاحف وأماكن تليق بالآثار دي، ففي أخبار عن موكب ملكي جديد للملك توت عنخ آمون، إيه القصة؟ وإيه تفاصيل أغلى القناع الذهبي للملك توت عنخ آمون اللي يعتبر أشهر قطعة آثرية في العالم؟
في موكب المومياوات الملكية، وزير السياحة والآثار الدكتور خالد العناني صرح بأخبار عن موكب ملكي تاني، هيكون لنقل قناع الملك توت عنخ آمون للمتحف المصري الكبير، اللي هيتم افتتاحه السنة دي، وهيكون في احتفالية كبيرة، وتخيل مشهد نقل القناع إنه هيكون في عربية مصفحة جوا صندوق زجاجي، وزيّ ما تم نقل المومياوات الملكية، هيتم نقل القناع بالشكل اللي يليق بأشهر قطعة آثرية في العالم.
القناع ده بتتكون دقنه من الدهب والأحجار الكريمة، اللي منها أنواع مش موجودة في أي مكان في العالم، والعلماء كانوا في البداية بيعتقدوا إنه القناع عبارة عن قطعة واحدة، لحد في وقت قريب اكتشفوا إنه مكوّن من قطعتين، تم لحامهم بطريقة سهلة، صعب تتعمل بالدقة دي إلا بآلات لحام حديثة، وده بيدل على عظمة وتقدم الفراعنة وأساليبهم اللي لحد دلوقتي ماعرفناش نكتشف أسرارها كاملة.