من فترة مش قليلة الكل كان متابع تطورات القضية اللي كانت مرفوعة على محمد رمضان من الطيار أشرف أبو اليسر، بعد ما نزل رمضان صورة لنفسه من مكان قيادة الطيارة (اللي مش المفروض إن حد يدخلها)، وده اللي تسبب في فصل الطيار ومطالبته بتعويض 25 مليون جنيه من رمضان، لإنه تسبب في سحب رخصته مدى الحياة لانتهاكه معايير السلامة أثناء الطيران.
وأصدرت المحكمة الاقتصادية في مصر حكمها في القضية امبارح، وألزمت رمضان بدفع تعويض 6 مليون لصالح الطيار الموقوف. وبعد صدور الحكم، نزل محمد رمضان فيديو صغير ليه وهو في حمام السباحة بتاع الفيلا بتاعته، وهو ماسك دولارات وبيرميها في المياه. معظم بوستات محمد رمضان اللي بيكون بيستعرض فيها عربياته أو أي من ممتلكاته بتسبب جدل وبتتقسم الناس بين البعض اللي بيشوف إنه من حقه يعبر عن فخره بنجاحاته، وغيرهم اللي بيقول إن ده غرور وتفاخر زايد.. بس البوست المرة دي مختلف.
في ناس شايفة إن طريقة رمضان في توصيل رسالة إنه مش فارق معاه الفلوس زادت عن الحد. لإنها ماكنتش تفاخر ولكن كانت إهدار للفلوس اللي هي نعمة كبيرة، وشوية الدولارات اللي اترمت دي كان ممكن تحل مشاكل فقراء كتير.. وده اللي خلى كتير من مستخدمي السوشيال ميديا يعبروا عن غضبهم من منشور رمضان اللي قالوا عليه إنه “مستفز” وكمان بيحرض على الاستهتار بالفلوس ونعمة ربنا اللي غيره ممكن يبقى محتاجها ومش لاقيها.