في يوم التطوع العالمي: أماكن تستحق التطوع في مصر

من يوم ما اتولدنا وطول رحلة حياتنا واحنا بندور على السعادة، وكل واحد بيلاقيها بشكل مختلف عن التاني، في اللي بيلاقيها في العيلة وفي اللي بيلاقيها في الصحاب، وفي اللي بيلاقيها في تحقيق نجاح في الحياة، ومن ضمن الحاجات اللي بتقدر تحسسنا بالسعادة ولفترة طويلة، هي إنك تسعد حد تاني غيرك، بمجرد ما تشوف ضحكته على وشه، دي كفيلة إنها تحسسك بإنك أهم حد في الدنيا وعملت أعظم إنجاز ممكن تعمله في حياتك، حتى لو كان اللي عملته بسيط، بس فكرة إنك تبقى سبب في رسم ضحك حد وإنك تحس إنك قدمت مساعدة لحد محتاج منك ده، بتحسسك إنك ملكت الدنيا، والتطوع من أعظم الوسائل اللي تقدر توصل لك الإحساس ده، إحساس السعادة اللي مابينتهيش مع الوقت، واليوم العالمي للتطوع جبنالكوا مجموعة الأماكن اللي لها دور في مجال الأعمال الخيرية وتستحق مننا التطوع علشان نزود فرص لمساعدة ناس أكتر.

Educate Me

مؤسسة بتهدف لتحسين المستوى التعليمي للأطفال خصوصًا للي بينتموا لأسر بمستوى مادي منخفض.

بنك الطعام المصري

هدف البنك الأساسي هو القضاء على الجوع في مصر واللي بيساعده في ده الحملات الإعلانية الكبيرة، والبرامج الكتيرة.

مؤسسة مصر الخير

بتهدف للمشاركة في تنمية الإنسان في مجالات الصحة والبحث العلمي والتكافل الاجتماعي، ده غير إنها بتشتغل على محاربة البطالة والأمية والفقر والمرض، ولها أكتر من فرع للمؤسسة في القاهرة وده بجانب فروعها في أكتر من محافظة مصرية زيّ أسيوط والأقصر وقنا وسوهاج.

جمعية علشانك يا بلدي

بتهدف لتقليل نسبة الفقر في مصر عن طريق خدمة الفئة المهمشة من المجتمع واللي نسبتها أكتر من 44% في المجتمع، ده غير إنها مسئولة عن أكتر من مشروع هدفه توفير فرص عمل وتدريب الشباب على الحرف والمهارات.

مؤسسة صناع الحياة

مؤسسة تنموية، بتقدم مشروعات لمحو الأمية ودعم المشروعات الصغيرة بجانب المساعدات الإنسانية، ده غير إن عدد المتطوعين فيها وصل لـ15 ألف متطوع.

الهلال الأحمر المصري

المكان ده من الأماكن اللي لها تاريخ كبير في التطوع في مصر، تاريخها بيعود للتلاتينات، وهدفها في مجال الإغاثة والكوارث ومجالات الصحة العامة.

جمعية رسالة الخيرية

من أشهر الجمعيات في مجال العمل الخيري، ولها أكتر من فرع على مستوى محافظات مصر، ولها أكتر من مجال ونشاط تقدر تطوع فيه، زيّ غسيل وكوي الملابس وتعبئتهم، تعليم أصحاب الهمم.

هيئة care الدولية

بتهدف لخدمة المجتمعات الفقيرة خصوصًا في صعيد مصر، بتهتم بحقوق المرأة وحقها في التعليم، بجانب قطاعات المياه والصرف الصحي والزراعة وإدارة الموارد الطبيعية.

مؤسسة وفاء لمصر

بتهدف لتنمية مجال الصحة والتعليم في مصر، وقامت بأكتر من إنجاز منهم في أبو الريش الياباني، والمعهد القومي للأورام ومركز الكلي والمسالك البولية، ده غير إنها بتدعم البحث العلمي ورعاية القوافل الطبية لفحص عيون الأطفال بالمدارس.

أخر كلمة: ماتفوتوش قراءة: اليوم العالمي لمناهضة العنف ضد المرأة: مجموعة من الإحصائيات بتبين حجم المشكلة..

تعليقات
Loading...