اتولد الفنان الكبير العظيم حسين فهمي يوم 22 من شهر مارس في سنة 1940 في القاهرة، ودرس الإخراج بالولايات المتحدة الأمريكية ولكنه اتجه للتمثيل، وحسين فهمي هو الشاب اللي جنن جمهوره من جيله وجيل اللي قبله وجيل اللي بعده، ولكن محدش عارف إيه سره، فحبينا نخمن إيه هو سره.
حسين فهمي شارك في أعمال فنية كتيرة جدًا من مسلسلات وأفلام ومسرحيات زيّ مسلسل “الشارد”، و”العراف”، و”هوانم جاردن سيتي”، و”المال والبنون”، و”أجمل أيام حياتي”، و”أميرة حبي أنا”، و”الرصاصة لا تزال في جيبي”، وبيتألق حسين فهمي في كل أدواره، فهو فنان موهوب، ومتمكن من توصيل الرسالة اللي ورا كل أدواره.
بعيدًا عن الأغنية اللي هديتهاله سعاد حسني في فيلم “خلي بالك من زوزو” اللي بعنوان “يا واد يا تقيل“، واللي كل كلمة في الأغنية بتوصفه، فهو كان فعلًا تقيل، وكان عاجبها هو وضحكته ومشيته، وهو عارف كل ده وبرضه بيتقل عليها، وده تقريبًا حال كل الستات تجاهه، وفكرنا إن يمكن تكون ثقته في نفسه هي اللي بتخلي الكاريزما في شخصيته عالية، فهو محتفظ بشعره الأبيض مهما تقدم في السن، ومحتفظ بأدائه القوي في أعماله الفنية، ولسه كمان محتفظ بتقله في مقابلاته التلفزيونية.