شاركت في الكتابة: آلاء عبد الحكيم
نعيمة عاكف، اللهلوبة، واحدة من أكتر الراقصات شهرة في مصر والوطن العربي، اتولدت في طنطا يوم 7 أكتوبر سنة 1929، وبدأت مشوارها الفني في سيرك والدها، وهي بتقدم استعراضات، وقدمت معاها فن الأكروبات في الشوارع.
وفي واحدة من العروض دي، شافها الفنان علي الكسار واكتشفها وطلب منها تشتغل هي وأخواتها معاه في فرقته، وتمر الأيام وتشتغل نعيمة مع بديعة مصابني واللي بتعتبر بابا المجال بتأسيسها فرقة خاصة بها للرقص والتمثيل المسرحي، ومن أشهر الرقصات اللي قدمتها نعيمة في فرقتها رقصة الكيلاكيت.
ومن بعدها انطلقت في عالم السينما، قدمها المخرج أحمد كامل للمرة الأولى كراقصة في فيلم ست البيت، وقدمها زوجها المخرج حسين فوزي في فيلم العيش والملح 1949، وبعدها بقت تشيل بطولات في مجموعة كبيرة من الأفلام الاستعراضية. قدمت فيها نوع جديد من الرقص، جمع ما بين فن الأكروبات وحركات السيرك والرقص الشرقي والغناء توليفة كده كانت صعب تتجمع مع حد غيرها.
ومن أشهر الأفلام اللي شاركت فيها: (ست البيت)، و(لهاليبو)، و(العش والملح)، و(بابا عريس)، و(أربع بنات وظابط)، و(تمر حنة)، و(الحقيبة السوداء).
جيل الخمسينيات والأربعينيات من الرقص الشرقي اللي اتخرجوا من مدرسة بديعة، كان من ضمنهم نعيمة عاكف وتحية كاريوكا وسامية جمال، هما اللي عملوا العصر الذهبي للرقص الشرقي اللي لسه لحد دلوقتي الناس بتتعلم منهم، لإنهم كانوا واخدين المهنة كفن حقيقي له أصول، وأبسط مثال على ده إن نعيمة عاكف أخدت لقب أفضل راقصة في العالم من مهرجان الرقص العالمي في موسكو 1958.