لأول مرة في العراق، رسم الصور بالخيط والمسمار، الفنان العراقي سعيد هويدي يبدع في رسم بنوع مختلف وبإمكانيات بسيطة، بمجرد إنه يمسك الخيط بإحكام بين أصابعه، ويشد الخيط بعناية بين المسامير اللي دقها في لوح خشبي، وينتهي بلوحات فنية بشكل مختلف وبسيط ومبهر، سعيد كمان شايف إنه الفن بيكون جميل لما تشتغل بقلبك وعقلك وإيدك، وده اللي خلاه يبدع في فن مختلف وجديد من نوعه في البلد، متكون من مجرد خيوط متشابكة.
فن الفيلوجرافيا أو فن الرسم بالخيوط موجود من القرن 19، وفي البداية كان بيستخدم لتسهيل تعلم الرياضيات للأطفال، بعد كدة إنتشر استخدامه في السجون علشان يساعد السجناء في تقضية الوقت كهواية مفيدة، النوع ده من الفن بيتطلب جهد أكبر ووقت أطول، وأضاف سعيد إنه كمان بيحتاج لوقت وجهد مضاعفين لو بيرسم بورتريهات لشخصيات، وإن ده النوع المفضل له في الرسم، والقطعة الواحدة بتاخد وقت حوالي من 10 لـ 15 يوم علشان تكون جاهزة.
ومن أشهر أعمال سعيد، رسمته للاعب كرة القدم العالمي كريستيانو رونالدو، ونشر سعيد فيديو على صفحته على انستجرام فيديو أثناء رسمه للصورة دي، بيوضح كمان مراحل الرسمة اللي هتبدو ليك في الأول إنها مجرد تشابك خيوط، بعد كده هتبتدي الصورة الفنية تتكون بسلاسة مبهرة.
بسبب عدم إنتشار الفيلوجرافيا في العراق، ورغم الاعتماد الكامل للفنان على بيع رسوماته كمصدر دخل أساسي، إلا إنه بيواجه مشكلة بسبب عدم بيع أعماله الفنية بأسعار جيدة، لكنه بيحلم بالانتشار داخل العراق وخارجها، وبيحلم بتنفيذ قطع فنية أكبر حجمًا.