من وقت ما اتعرض فيلم “علاء الدين” وعرفنا إن مينا مسعود من أصول مصرية، وهو بقى ليه قاعدة جماهيرية كبيرة في مصر، رغم إنه ماشتركش في أي أعمال مصرية أو حتى عربية.. ولكن أدائه وشخصيته المميزة في الأعمال اللي شارك فيها، هي اللي خلت ليه مكانة وتواجد بين الجمهور المصري والعربي.. فلو انت من الناس اللي بتحب مينا مسعود، إحنا عندنا ليك خبر حلو!
اقرا كمان: الفنان أمير المصري يشارك في مسلسل “Industry” من إنتاج HBO
أكد جورج شحاتة مدير أعمال الفنان العالمي مينا مسعود، تعاقد مينا لبطولة فيلم مصري عالمي بعنوان “في عز الضهر” علشان يكون أول تجربة وعمل لمينا في مصر. والمفروض إن مينا هيوصل مصر في أول أسبوع من شهر يناير ده علشان يستعد للتصوير. الفيلم من تأليف كريم سرور وإخراج مرقس عادل، وبيشارك في الفيلم هنا الزاهد، محمود حجازي، محمد عز، محمد علي رزق، إيهاب فهمي، وأحمد جمال سعيد. وكمان من قريب أعلنت الفنانة ميرنا نور الدين انضمامها لفريق العمل وهتجسد شخصية راقصة باليه اللي بتدخل في قصة جب مع مينا في أحداث الفيلم. و كمان من المقرر إن الفنانة هبة الدسوقي تنضم لـcrew الفيلم.
أما بالنسبة لقصة الفيلم، فبتدور الأحداث حوالين عصابة دولية بترتكب كذا جريمة، وبتبدأ الأحداث تتغير لما يبدأ زعيم العصابة مينا مسعود يقع في حب واحدة من البنات. ونشر الممثل محمد عز بوستر الفيلم علشان نتأكد من الخبر، وبصراحة إحنا مش قادرين نستنى انتهاء العمل ونزوله في السينمات، علشان نتفرج على التحفة الفنية اللي جاية!