في الفترة الأخيرة بدأنا نشوف أعمال أكتر من بطولات جماعية زيّ ما شوفنا مؤخرًا مسلسل “نمرة اتنين” اللي ضم نخبة كبيرة من نجوم الصف الأول زيّ منى زكي، وآسر ياسين، وإياد نصار، وفنانين كتير تانية.. ولإن نجاح الأعمال اللي من بطولات جماعية بتبقى ساحقة، والـ cast القوي بيضيف كتير للعمل، فبدأنا نشوف ده في الأعمال اللي جاية، ومن يومين بدأ فريق عمل فيلم “أهل الكهف” في تصوير أولى مشاهد الفيلم.
وأعلن الكاتب أيمن بهجت قمر على حسابه على تويتر عن بدء تصوير الفيلم، وهو من بطولة عدد كبير من النجوم منهم الفنان خالد النبوي، وغادة عادل، ومحمود حميدة، وخالد الصاوي، وريم مصطفى، وفتحي عبد الوهاب، ومحمد ممدوح، ومحمد فراج، ومصطفى خاطر، وبيومي فؤاد، وعبد الرحمن أبو زهرة.. والفيلم من تأليف الكاتب العظيم توفيق الحكيم، ومعالجة سينمائية للكاتب أيمن بهجت قمر، وإخراج عمرو عرفة، ومن إنتاج وليد منصور. أما بالنسبة لقصة الفيلم فهي بتتكلم عن تحديات وصراعات أشخاص، فاقوا من النوم بعد تلات قرون علشان يلاقوا نفسهم في زمن آخر مايعرفوش عنه حاجة.
ومن المقرر تصوير الفيلم في دول مختلفة منها العربية وكمان الأجنبية منهم إيرلندا ومصر والمغرب، والمفترض إنه يخلص تصويره ويتم عرضه في شهر مايو اللي جاي علشان يتزامن موعد عرضه في عيد الأضحى المبارك، وفكرة الفيلم كانت هتتقدم كذا مرة قبل كده لكن كان المنتجين بيخافوا لإن الفيلم بيتطلب مصاريف إنتاجية عالية، ولكن في النهاية وبعد كذا سنة، قرر المنتج وليد منصور إنه ياخد الفرصة وينتج الفيلم.. وبصراحة محدش قادر يستنى نهاية التصوير وخروج العمل للنور!