فازت رانيا الغباشي المهندسة المصرية في توطين المنتجات في شركة جنرال موتورز الأمريكية بجائزة عالمية، وبكده تعتبر أول وأصغر مهندسة ميكانيكية مصرية وأفريقية وعربية تكسب الجائزة دي في جنرال موتورز، واعتبروها موظفة العام المثالية لسنة 2020 وخدت جائزة ستيفي الفضية الرسمية للسيدات في مجال الأعمال وكمان شهادة ستيفي الفضية من الولايات المتحدة الأمريكية في مجال الأعمال لفئة تصنيع السيارات.
واعتبرها حكام المسابقة مثال لكل السيدات، والمسابقة كان فيها أكتر من 1500 مرشح من 33 دولة، واختاروها علشان سجلها الكبير واللي بيثبت اجتهادها وإرادتها وإمكانياتها في تحدي العقبات، وقالت المهندسة رانيا إنها بتحاول إن يبقى ليها تأثير في العالم، ومابتخافش تاخد خطوات كبيرة وجديدة.
جائزة ستيفي هي زيّ جوائز الأوسكار بس في مجال الأعمال، وهي مسابقة دولية للمرأة اتأسست من أصحاب جوائز American Business، وهي تعتبر الجائزة الأولى في مجال الأعمال، وهدفها تكريم وتقدير الإنجازات والمساهمات الإيجابية للمنظمات والمهنيين اللي بيشتغلوا في كل العالم.