ذكرى وفاة الفنان محمود الجندي السنة دي بتتزامن في رمضان مع عرض واحد من أهم الأعمال اللي شارك فيها، وهو مسلسل (رمضان كريم)، اللي اعتبره الجمهور أيقونة لشهر رمضان، مهما يتفرجوا عليه باقي السنة بيحسسهم بجو رمضان الحقيقي اللي بيستنوه، والسنة دي المسلسل في موسمه التاني بيحيي ذكرى محمود الجندي بشكل جميل ومؤثر.
المسلسل السنة دي طلّ على جمهوره في الجزء التاني اللي الناس كانت بتطالب به ومستنياه بفارغ الصبر، لكن بغياب عدد من النجوم والأبطال اللي شوفناهم في الجزء الأول لأسباب مختلفة. وللأسف الفنان محمود الجندي توفى قبل الجزء التاني، لكن أبطال وصناع العمل قدروا يحيوا ذكراه في كل حلقة تقريبًا وهما معلقين صورته وبيترحموا عليه، ومافيش حلقة بتعدي من غير ما نفتكر ذكرى الشيخ كريم، اللي كان بيلم عيلته في الشهر الكريم.
مع غياب عدد من نجوم الجزء الأول، الجزء التاني من المسلسل شهد انضمام مجموعة من الفنانين الجداد، بخطوط درامية جديدة بعيدة تمامًا عن الجزء الأول، على سبيل المثال دور الفنانة سلوى خطاب، والفنان بيومي فؤاد، والفنانة إنعام سالوسة اللي شاركت بدور صغير في الجزء الأول، لكن في الجزء التاني شوفناها بخط درامي جديد ودور أكبر، لكن الجمهور بيفتقد وجود الراحل محمود الجندي عن المسلسل.
الفنان محمود الجندي رحل عن عالمنا لكن ساب لنا اللي بيحققوا من بعده مثل “اللي خلف ماماتش”. ناس كتير ماتعرفش إن المخرج أحمد الجندي هو ابن الفنان الراحل محمود الجندي، وأحمد قدم أعمال فنية كتير اتعلق بها الجمهور زي مسلسل الكبير، وفيلم طير أنت، وفيلم بنك الحظ، وفيلم لا تراجع ولا استسلام، وفيلم الحرب العالمية التالتة.
كمان ناس كتير ماتعرفش إن الفنانة مريم الجندي اللي شوفناها متألقة في مسلسل (بالطو) هي ابنة الراحل محمود الجندي. ويعتبر دورها في (بالطو) هو أهم وأكبر أدوارها لحد دلوقتي حسب تصريحاتها، ومريم ممثلة مسرح اتعلمت في ورشة المخرج خالد جلال.