النهارده 3 فبراير، وده بيوافق ذكرى وفاة الفنانة الكبيرة العظيمة أم كلثوم اللي لقبوها بكوكب الشرق، وهي توفت في سنة 1975 بعد ما عانت من المرض، وبدأت مشوارها الفني من صغرها، وهي ماكنتش مجرد مطربة، هي بالفعل كانت ومازالت كوكب، كوكب للطرب، والإحساس، والمشاعر، والفن في الشرق، فتعالوا نبص على حاجات تثبت إنها لسه معانا وهتفضل معانا.
المزيكا
موسيقى أغانيها ماتتوصفش، فرغم إن في هزار كتير على طول مدة الموسيقى ولكن في الأول والأخر بنيجي نسمعها ونستمتع بيها ونحسها.
الكلمات
كلمات أغانيها كلها معاني ومشاعر وأحاسيس، وبتوصف حاجات كتيرة أوي بأبسط الكلمات، بنحس بيها من أعماق قلبنا.
صوتها
صوتها اللي بيضيف على الحاجتين دول أحاسيس أكتر، بقوته وبجماله.
طريقتها
طريقتها في سرد الكلام وهي بتغني بتأكد إنها بتقول الكلام ده من قلبها، وهو مش مجرد كلام متألف وبس.
حضارتها
أم كلثوم مش مجرد مطربة كبيرة وعظيمة، أم كلثوم بقت جزء من تاريخ وحضارة مصر، والشرق الأوسط عامة، ولكنها حاجة من الحاجات اللي بتميز مصر والفن الشرقي، وبتسمعها في كل بيت.
المنديل
المنديل اللي بتمسكه في إيديها كان علامة مميزة ليها، وكان بيتقال إنها كانت بتمسكه علشان كانت بتتوتر من المسرح والدكتور عرض عليها الفكرة دي علشان يخفف التوتر.