يوم 3 فبراير بيوافق عيد ميلاد المحامية والناشطة الحقوقية أمل علم الدين-كلوني، والحقيقة إن دي مناسبة نقدر نستغلها ونتكلم فيها عن إنجازات أمل، وإزاي كان ليها دور كبير في تمكين المرأة والدفاع عن حقوقها، وإزاي قدرت بمواقفها وإنجازاتها المهنية والإنسانية إنها تبقى مثال للمرأة العربية الناجحة اللي كلنا نفخر وإحنا بنقول إنها من أصل عربي.. وعلى مر السنين شوفنا قضايا مختلفة دافعت عنها وكمان شوفناها على الصعيد الشخصي إزاي هي إنسانة جميلة مش بس خارجيًا ولكن داخليًا كمان، وعلشان نعبرلها عن مدى حبنا وفخرنا بيها، دول مجموعة من الأسباب تخلي أمل كلوني رمز مهم وأحد أهم الرواد النساء في العالم العربي.
تفوقها المهني كمحامية محترفة
أمل مش بس اختارت إنها تشغل مهنة صعبة وخطيرة، ولكنها اختارت كمان النجاح فيها، فتم تصنيف أمل في الدلائل القانونية الرائدة “Chambers and Partners &Legal 500” كأحد أفضل المحامين في المملكة المتحدة في مجالات حقوق الإنسان الدولية والقانون الجنائي الدولي، وبجانب ممارستها لمهنة المحاماة فهي كمان أستاذة زائرة في كلية الحقوق بجامعة كولومبيا، وشاركت في تدريس مقرر حقوق الإنسان، وكمان بتقدم دورات تدريبية بشكل منتظم للقضاة ومسؤولي الدولة ومحققي الأمم المتحدة بشأن القانون الجنائي الدولي وحقوق الإنسان.
اهتمامها بالقضايا العربية وتقديمها للتبرعات
اشتركت أمل مع زوجها جورج كلوني في إرسال 3000 لاجيء سوري علشان يتلقوا التعليم ويروحوا للمدارس في لبنان، بعد ما حصل مشاكل في سوريا، وقالت مؤسسة كلوني للعدالة إنها اشتركت مع شركتي جوجل وهيوليت باكارد لمساعدة منظمة الأمم المتحدة للطفولة (يونيسيف) ووزارة التعليم اللبنانية في فتح سبع مدارس باسم مدارس “الفترة الثانية” للاجئين السوريين.. وكمان وقت انفجار مرفأ بيروت اتبرعت كمان هي وجورج كلوني بمبلغ ضخم لمساعدة مصابين الانفجار.
استقلالها المادي وتحقيق ذاتها قبل الزواج
في مجتمعاتنا العربية كتير بنشوف عقليات بتدعم فكرة إن البنت تبقى معتمدة ماديًا على جوزها، وده اللي بيخليها مجبرة في كتير من الأحيان إنها تفضل متجوزة وهى مش مرتاحة في الجوازة لمجرد إنها مش مستقلة ماديًا، ولكن أمل في المنطقة دي كمان قدرت تبقى مثال قوي.. فنجاحاتها وتفوقها المهني خلاها تقدر تعمل ثروة كبيرة تقدر تعيش بيها من غير ما تعتمد على فلوس أي حد تاني.
كونها أيقونة في الأناقة
الانشغال بقضايا ومهنة مهمة زيّ المحاماة، ماخلهاش أبدًا تهمل في شكلها بالعكس! فمن المعروف عن أمل علم الدين ستايل لبسها دايمًا بسيط ولكنه شيك في نفس الوقت.. ولبسها للفساتين الكلاسيكية بقى جزء لا يتجزأ من إطلالتها المميزة.
الموازنة بين حياتها العملية وعائلتها
الحياة تحت الأضواء بصفة مستمرة أكيد مابتكونش سهلة، وخصوصًا إن أمل متزوجة من شخص مشهور زيّ جورج كلوني، وانشغلها مع ده بعملها.. فبرغم المشاغل المختلفة، فهي بتقدر توازن بين حياتها في الشغل، وبين حياتها العائلية مع جورج وطفليها التوأم.
استمرارها في الدفاع عن قضايا مهمة
اسم أمل كلوني كان مرافق لقضايا دفاع مهمة وكبيرة، وبكل شجاعة كانت بتصر أمل إنها تطالب بحقوق المظلومين وتجيب حقهم مهما كان، فحركت أمل كذا دعوة ضد الحكومة أمام فريق الأمم المتحدة بشأن بعض الاحتجازات التعسفية، وكمان مانقدرش ننسى دفاعها في قضية نادية مراد اللي تنظيم “داعش” قتلوا إخواتها وعائلتها قدام عنيها، وكمان كانوا بيتناوبوا الاعتداء عليها واغتصابها لحد ما قدرت تهرب منهم.. فقدمت أمل كل أنواع الدعم في القضية دي.
دورها المؤثر في تمكين المرأة العربية
لكل الأسباب اللي ذكرناها فوق، قدرت أمل إنها تلهم ملايين من العرب حول العالم، مش بس لإنجازاتها المهنية، ولكن الشخصية كمان، فبرغم كل اللي حققته أمل، ولكنها قدرت تحتفظ بشخصيتها المتواضعة والقريبة من الناس، وتم إطلاق جائزة جديدة باسم “Amal Clooney Award” من برنس ترست إنترناشونال، علشان تقدم الجائزة دي احتفالًا بإنجازات النساء الشابات الملهمات حول العالم، وبتسلط “جائزة أمل كلوني” الضوء على أعمال الشابات اللي نجحوا رغم الصعاب في إنهم يعملوا فرق دائم وحقيقي في مجتمعاتهم، وإطلاق الجائزة دي وباسمها اعتراف ضمني وعالمي بتأثيرها على السيدات حول العالم.