بيحتفل العالم كل سنة يوم 6 من شهر فبراير باليوم العالمي لمناهضة ختان الإناث، العادة اللي بتسبب أضرار نفسية وجسدية مالهاش آخر للبنات والستات وأحيانًا بتؤدي للوفاة، واللي بقى جريمة طبقًا للقانون المصري من سنة 2008، لكن للأسف لسه بنلاقي حوادث كتير بسبب ختان الإناث، اللي بيشارك فيها أباء وأمهات وأطباء كمان للأسف، لكن وسط كل ده، فيه ناس لسه بتحارب العادة السيئة دي، ودكاترة بتعمل عمليات ترميم للختان وبتقدم الدعم النفسي والمعنوي للستات اللي اتعرضت للختان علشان يساعدوهم إنهم يتخطوا الأضرار اللي تسببت فيها العملية دي.
يمكن تكون أول مرة تسمع جملة “ترميم ختان الإناث” ، لكن دي عملية موجودة في مصر، بفضل دكاترة فكروا إنهم يقدموا المساعدة للبنات والستات اللي تعرضوا للأذى تحت مسمى الختان، وقرروا يقدموا الدعم الطبي من الناحية الجسدية من خلال عمليات ترميم للأضرار اللي بيسببها الختان، وكمان الدعم النفسي للستات اللي حصلهم ختان ومساعدتهم على تخطي ده.
اقرا كمان: لإمتى هنسكت على العنف الأسري؟! مقتل الموديل اللبنانية زينة كنجو على إيد زوجها.
وفي اليوم ده، اتكلمنا مع دكتور عمرو سيف الدين ودكتورة ريهام عواد، استشاريين أمراض النسا والتوليد وتجميل وتقويم الأعضاء الأنثوية، عن حاجات كتير تخص ختان الإناث، أصوله وأنواعه وإزاي بيقدروا يقدموا الدعم لمناهضة ختان الإناث.