عناصر العمل الدرامي من أصغرها لأكبرها معمولة علشان تخدم على العمل نفسه، من الديكور والإضاءة والشخصيات، وصولًا للأزياء، في أزياء تخدم على العمل ولكن تمر مرور الكرام، وفي أزياء تخدم وتطبع في أذهان الجمهور، وتاخد شهرة تعادل شهرة العمل وتكاد أحيانًا تطغى عليه.
بدلة خلف الدهشوري خلف
بدلة ظهرت في فيلم (صعيدي في الجامعة الأمريكية) في التسعينات قلبت الجامعة وقتها وجمهور الفيلم معاها، بتظهر من حين لآخر على السوشيال ميديا لما حد يحب يتكلم عن شياكته وأناقته المعهودة فبياخد خلف الدهشوري وبدلته كمثال، مؤخرًا بقت موضة نجوم هوليوود كمان وعملوا منها جواكت وفوتوسيشن (جلسات تصوير) لأشهر الماركات العالمية.
بدلة الدهشوري اتحولت من بدلة اشتراها محمد هنيدي من الوكالة علشان تخدم على الشخصية لـبدلة عالمية بيتم إصدارها من بيوت الأزياء العالمية بنفس مواصفتتها.
جلابية هنومة في باب الحديد
فيلم (باب الحديد) واحد من أهم أفلام السينما المصرية، الفيلم كان فيه مشاهد أيقونية كتير، بس تخيل إن جلابية هنومة “هند رستم” أخدت شهرة تكاد تعادل نفس شهرة الفيلم؟ جلابية ممزقة ظهرت بها أكتر من نص عرض الفيلم، ولو بصينا على الفيلم نفسه، هنلاقي إن هنومة ماغيرتش ملابسها غير مرتين بس، جلابية وحيدة قدرت تبقى أيقونة وقدمت بها دور الإغراء المطلوب منها في السيناريو مع شخصية بنت الشارع وأثبتت إن الإغراء مش بيتطلب نوع معين من الملابس، في حين إن الجمهور أحيانًا بينتقد النجمات على تغيير لبسهم بين المشهد والتاني، ده غير إنها بتبقى من أحدث بيوت الأزياء.
فستان خلي بالك من زوزو
فستان زوزو وتسريحة أو كحكة زوزو، بعد عرض الفيلم كل الستات والبنات كانت عايزة تقلد نفس التسريحة عند الكوافير ويبقى عندها نفس الفستان، شهرة الفستان كانت من مشهد واحد بس وكانت من شهرة المشهد نفسه، كان مشهد محوري، وفي لحظة من لحظات تطور الأحداث في العمل، ومع محاولة إذلال أمها العالمة من أهل حبيبها، قررت زوزو إنها تاخد مكان والدتها وترقص هي.. الرقصة مع الفستان عملوا حالة من مشاعر الحزن المدفونة والكسرة والقهرة المستخبية مع محاولتها بالرقصة إنها تبرد مرارة والدتها.
فستان أسود بجاكيت أحمر لامع موجود ضمن مقتنيات سعاد حسني وممكن تلاقي لحد النهارده شخص يبقى عايز يشتريه بمبالغ خيالية.
شابو بكيزة هانم
” جربعة مش هتجربع.. ذل مش هتذل فقر مش هفتقر” بكيزة هانم الدرملي في مسلسل بكيزة وزغلول كان عندها بيت أزياء متحرك ولما فلست باعت كل هدومها في عرض أزياء وفضلت محتفظة بالشابوه ده، كانت رمز لسيدة المجتمع الارستقراطية، كانت بتلبسه وتقعد بيه.. زي طبقة المتشبثون اللي اتكلمنا عنها قبل كده.. ماعكش مليم بس لازم تعيش في نفس مستواك حتى لو نمت من غير عشا بس البرنيطة أهم.
جلابية عبد الغفور البرعي
الجلابية والشال والعمة والشبشب، أربع قطع أزياء كونوا الرجل المكافح شخصية عبد الغفور البرعي، هيئة عبد الغفور نفسها أخدت اتجاه وبطولة لوحدها، وأحيانًا بعض النجوم بقوا يستوحوا من إطلالات عبد الغفور لما يتزنقوا في تصور لشخصية الرجل المكافح، لإنها فضلت ملازماه حتى بعد ما بقى عنده 7 عمارات.
موضوع الأزياء المكتسبة شهرة بنلاقيه بيظهر أكتر والناس بتاخد بالها منه وتركز مع الشخصيات ومين لبس إيه في حفلات الهالوين لما الناس تقرر تعمل حفلة هالوين. وكمان لسة فاكرين أزياء تعتبر أيقونات في أفلام ومسلسلات حتى لو عدى عليهم سنين.