في استقبال رمضان: 5 حاجات تتعمل بالإيد علشان تدي أجواء الشهر الكريم
مع دخول شهر رمضان علينا، وعلشان في ناس كتير بتستمتع بالشغل اليدوي، وإنها تعمل احتياجاتها بنفسها في البيت، هنناقش في المقال ده 7 أفكار لحاجات ممكن نعملها في البيت مع أولادنا، ومن خلال خطوات بسيطة، تبسطنا وتبسط الأطفال وتحسسهم بفرحة الشهر الكريم.
نجف وفوانيس وهلال ونجوم
هنجيب ورق سميك من عند أي مكتبة، والورق ده بيبقى فيه ألوان مختلفة وحاجات بتلمع، بس واحنا في المكتبة نبقى نختار ورق يمشي مع ألوان الحيطان والأثاث في البيت.
وبعد ما نقص الورق على شكل هلال ونجوم وفوانيس، هنعمل خرم في الطرفين، وبخيط نوصل هلال بنجمة بهلال بفانوس.. إلخ، علشان نعمل صف، وباستخدام مسدس شمع ممكن نلزق الخيط في الورق.
وبعد ما نلزق الصفوف على الحيطة بمسدس الشمع/ ممكن نضيف عليهم حبل نور بالطول أو بالعرض، ولو كان ملون كمان بألوان مناسبة للحاجات، هتخلي الفكرة ألذ بكتير.
غير إن الفكرة حلوة وهتضيف جو رمضاني مبهج على البيت، الأطفال هيستمتعوا جدًا بالشغل فيها، وهيتعلموا يبتكروا ويحلوا المشاكل ويشتغلوا بإيديهم.
قوالب شمع رمضان
هنجيب ورق ملون من أي مكتبة، ونقصه ونفرغه بأشكال ورسومات ونقوش رمضان أو أي رسومات بنحبها، وهنلفه على برطمان زجاج، ونحط في البرطمان شمعة.
لما ننور الشمعة جوا البرطمان، هتعمل لعبة ضوء وظل جميلة، وعلى سفرة الفطار والسحور هتدي أجواء رمضانية لذيذة ودافية.
طبق رمضان بالخط العربي
لو لنا في الرسم والكتابة بالخطوط العربية، الفكرة دي هتبقى ممتعة في التنفيذ، والنتيجة هتبقى مبهجة جدًا. الموضوع كله إننا هننزل منطقة الحسين، وفي شارع المعز هنلاقي ورش خزف كتير بتعمل أطباق باحجام وألوان مختلفة، وبيخرموا الطبق ويركبوا فيه خيط علشان يتعلق على الحيطة.
بعد ما نشتري الأطباق اللي احنا عايزينها، ومعانا الحبر والقلم الخشب اللازم، ممكن نبدأ نكتب الجمل اللي احنا عايزينها، سواء آيات من القرآن الكريم، أو أدعية، أو أي حاجة بنحبها، وممكن كمان نفنن نقوش ورسومات مختلفة، ونعلقها على الحيطة. هتبقى جميلة جدًا.
قماش الخيامية
عند مسجد الحسين، في منطقة اسمها الخيامية، لو راكبين من رمسيس العربيات التمناية ممكن تنزلوا في الحسين قصاد شارع الخيامية على طول، في الشارع ده هتلاقي محلات قماش في كل حتة، وأشكال وألوان من القماش بأسعار مختلفة.
قماش رمضان الملون بالأحمر والأصفر وبنقوش رمضان المميزة، موجود في كل حتة وبأسعار مختلفة، ممكن تشتري من القماش ده وتروح للترزية اللي ماليين الخيامية وتطلب منهم يعملوا منها أكياس مخدات، ومفارش للسفرة ولطرابيزات الأنتريه.
بس لازم قبل ما ننزل ناخد مقاسات الطرابيزات والمخدات علشان نروح للترزي بهم، وقبل ما نشتري القماش نعدي على ترزي نقوله عايزين إيه بالظبط والمقاسات، وهو هيقول لنا نجيب كام متر قماش، وكمان ممكن نسأله عن الأسعار علشان واحنا بنشتري نبقى عارفين.
عندك جنينة؟ يا سلام.. هننبسط خالص
لو عندك جنينة، فأنت ماحدش قدك بقى! الجنينة مساحة مفتوحة ومحتاجة إضاءة لذيذة، وعلشان كده ممكن تنزل سوق الكهربا في منطقة جمال عبد الناصر في وسط البلد، وتشتري حبل نور ملون وتعلقه وسط الشجر.
وتفرش مخدات بقماش الخيامية الرمضاني على الأرض، ومعاها مفارش للطرابيزات بنفس القماش. وعلى الطرابيزات تحط الشمع اللي في البرطمانات، وتتنزل منطقة السيدة زينب وتشتري فانوس كبير وتحطه في أي زاوية، ولو تقدر تعدي به على سوق الكهربا يركب لك فيه لمبة صفرا، هتبقى جميلة جدًا.
أخيرًا: دي أفكار بسيطة كده للحاجات اللي ممكن نعملها بسهولة في البيت، علشان ندي مساحتنا الخاصة جو رمضاني مميز يعيشنا حلاوة الشهر الكريم، لو تعرف أفكار تانية بتعملها بنفسك، قل لنا عليها في التعليقات.