دخل قانون فصل الموظف متعاطي المخدرات حيز التفيز مؤخرًا. وكانت أول حالة يتم التطبيق عليها في مديرية التربية والتعليم في محافظة القليوبية. واتحكم على خمس موظفين بالسجن المشدد وتغريمهم 10 آلاف جنيه بعد ثبوت تعاطيهم للمواد المخدرة. وقالت اللجنة الطبية المكلفة بفحص العينات إنه تم ثبوت تعاطي موظف ومدرسين مخدر الحشيش والأفيون. واتنين تانيين هربوا من الفحص فتم إحالتهم للنيابة الإدارية ومن ثم للمحاكمة التأديبية ووقفهم عن العمل.
طب إيه هو نص قانون فصل الموظف متعاطي المخدرات؟
مبدأيًا شرط أساسي إنك تتعين في وظيفة أو إنك تترقى أو تتنقل وظيفة تانية أو يتم ندبك في مكان تاني أو علشان تستمر أصلًا في الوظيفة بتاعتك إن تحليل المخدرات والعينة بتاعتك تبقى سلبية من خلال فحص اسمه “الفحص الفجائي” أو “الاستدلالي”. ولو نتيجة العينة إيجابية هيتم وقفك عن العمل لمدة بيحددها القانون أو لحد ما يظهر نتيجة التحليل التوكيدي. وطول فترة الوقف بيتم صرف نص أجر الموظف. ولو طلعت نتيجة التحليل التوكيدي إيجابية هي كمان بيتم إنهاء خدمة العامل بالقوة وبتحدد حقوقه طبقًا لقوانين ولوائح العمل.
وبيضيف القانون إنه في حالة لو الموظف امتنع عن عمل التحليل. أو هرب بعذر غير مقبول يعتبر ده مبرر لإنهاء خدمته. وإن الشخص اللي بيسمح متعمدًا إنه يوظف شخص متعاطي المخدرات هيبقى في غرامة ماتقلش عن 100 ألف جنية وماتزيدش عن 200 ألف.
إحصائيات وأرقام لازم نحطها في الاعتبار
مدير صندوق مكافحة الإدمان قال إن الهدف من القانون ده هو تضييق الطريق على المدمنين والمتعاطيين إنه مايبقاش لهم طريقة واحدة غير العلاج. وقال بعض الأرقام لازم تتحط في الاعتبار.
- اتعمل إجراء تحليل المخدرات في 2014 وكانت نسبة التعاطي أكتر من 10% على نص مليون موظف بس!
- مصر في المرتبة الـ10 بين دول العالم استهلاك للتبغ.
- الحشيش الأكثر انتشار بين المدمنين وبعده مخدر الشابو. والمخدر ده بالذات كان سبب في تغيير نمط الجريمة في مصر “لو فاكرين حادثة قتل زوج لزوجته وفصل راسها عن جسمها كان برضه بيتعاطى المخدر ده”. وده لإنه بيزيد السلوك العدواني بشكل كبير وبيخليك ترتكب الجريمة بدم بارد!
- 72% من جرائم الأحداث ارتكبت تحت تأثير الحشيش. و50% منهم بيتعاطوه لحد الإدمان.