أعلنت وزارة الصحة المصرية عن مشاركتها الفيسبوك في حملة جديدة لتشجيع المواطنين على التبرع بالدم. الهدف من الحملة دي هو تشجيع المتعافين من فيروس كورونا على التبرع ببلازما الدم للمساهمة في علاج الحالات الحرجة من مصابي الفيروس. المبادرة دي جت بعد نجاح تجربة العلاج بالبلازما في مصر على عدد من الحالات الحرجة في مستشفيات العزل اللي أظهرت استجابة لطريقة العلاج الجديدة ونتائج مبدئية مبشرة.
أي شخص عمره بين 18 و 65 سنة يقدر دلوقتي يسجل كمتبرع بالدم على الفيسبوك من خلال خاصية “التبرع بالدم” أو “Blood Donations” الموجودة في الملف الشخصي، أو ممكن الوصول ليها من هنا.
كل اللي هيسجل نفسه كمتبرع هتجيله إشعارات بتقوله على الأماكن القريبة منه اللي ممكن يتبرع فيها، وهيتم إبلاغه لما يكون في احتياج للدم في واحد من بنوك الدم اللي جمبه. التبرع ده ممكن يتم من خلال 28 فرع لمراكز خدمات نقل الدم القومية بمصر اللي من ضمنهم ٥ فروع متخصصة للتبرع ببلازما المتعافيين من فيروس كورونا.
الحملة دي هتساعد كل اللي عاوزين يتبرعوا بالدم إنهم ياخدوا كل المعلومات والإرشادات اللي هتساعدهم يتبرعوا بشكل سليم ويضمنوا وصول تبرعاتهم دي للأشخاص المحتاجين ليها فعلاً.
ومن ناحية تانية، أعلن فيسبوك اطلاق أبليكيشن “مسنجر كيدز” للأطفال في منطقة الشرق الأوسط وشمال أفريقيا. الأبليكيشن ده هيساعد أولياء الأمور على إيصال أطفالهم بأصدقائهم وعائلاتهم في 20 دولة عربية زي الجزائر والبحرين والأردن والسودان والسعودية.
ميزة الأبليكيشن ده إنه هيتيح للأهالي القدرة على التحكم ومراقبة أطفالهم، وده عن طريق لوحة التحكم اللي هتكون متاحة ليهم في ابليكيشن الفيسبوك الخاص بيهم. اللوحة دي هتمكنهم من مراقبة محادثات أطفالهم سواء نصية أو مرئية، وتحديد الوقت اللي يقدروا يستخدموا فيه التطبيق، والإطلاع على سجلات الصور ومقاطع الفيديو اللي بيشاركوها مع أصدقائهم، والتحكم والإشراف على الصداقات بتاعتهم، وده بالإضافة لخدمات تانية كتيرة.
مسنجر كيدز مُتاح دلوقتي على أنظمة الأندرويد والـ iOS، وحساب الأطفال بيعمله الأهالي باستخدام بيانات حسابهم الخاص على الفيسبوك، وبالتالي مش هيكون في حسابات شخصية للأطفال على المنصة الأساسية.