مجتمع مسلم، أمريكا، نوستالجيا مصرية، شباب متلغبط بين أصوله المتحفظة والانفتاح حواليه في كل مكان، كل ده بيمثل توليفة مسلسل “رامي” الجديدة اللي بيعرضهلنا في شكل كوميدي ودرامي في موسميه الأول والتاني.
بيتناول المسلسل اللي بتعرضه منصة Hulu الأمريكية حياة المهاجرين العرب في أمريكا، وبيعرض كل اللي بيتعرضوا ليه من تحديات الهوية والانتماء والتخبط بين معايير الشرق والغرب بشكل كوميدي من خلال قصة البطل “رامي” الشاب المصري المسلم اللي عايش في ولاية نيوجيرسي مع عيلته، وبيمر بمواقف فيها تناقضات كتيرة وصدمات ثقافية وإنسانية.
استوحى مؤلف المسلسل وبطله رامي يوسف قصته من حياته الشخصية، وحقق الجزء الأول منه نجاح كبير السنة اللي فاتت، خصوصاً بعد ما فاز رامي بجائزة الجولدن جلوب لأفضل ممثل كوميدي عن دوره في المسلسل.
الجزء التاني من المسلسل بدأ عرضه مع نهاية شهر مايو، وفي حلقاته العشرة بنلاقي رامى بيتعمق أكتر فى رحلته لفهم نفسه، وبيحاول يحقق التزام أكبر بمعتقداته الدينية اللي دايماً بيلاقي طريقة يدور بيها حواليها ويخالف كتير منها في حياته اليومية. بتعكس شخصية رامي حياة شباب كتير تايه في حياته بين عاداته وقيمه اللي المفروض مؤمن بيها، والقيم المُغايرة المتحررة الموجودة في المجتمع اللي عايش فيه. وعلى الرغم من إن رامي بيلاقي الإرشاد والهداية مع الشيخ علي اللي بيقوم بدوره الممثل العالمى مارشالا علي، إلا إنه بردو بيستمر في تخبطاته، وده بيدل على إن مشاكله مش بس بسبب الظروف المحيطة بيه ده هو كمان مش محدد هو عاوز إيه ومش ثابت على مواقفه.
المسلسل بيلقي الضوء على شخصيات كل أبطاله وبيبين معاناتهم مع مشاكلهم وظروفهم اللي هما مسئولين عن تغذية أغلبها وتفاقمها بتصرفاتهم زي الأم اللي حاسة بالوحدة لأنها مكرسة كل حياتها لعيلتها مع إنها ممكن تخرج وتتعرف على الناس وتجدد في حياتها. وعلى الرغم من الانتقادات اللي اتعرضلها “رامي” بسبب ظهور ميا خليفة ممثلة الأفلام الإباحية في أحد مشاهده، والطريقة الجريئة اللي بيعرض بيها صراعات شخصياته الداخلية، المسلسل بيعرض الشخصيات العربية في أمريكا بشكل مُختلف مكنش تم تناوله خالص في الأعمال الأجنبية، وده لأنهم كانوا دايماً بيتم تصويرهم بشكل سطحي إما في صورة إرهابيين أو العكس كأشخاص مسالمين بيتعرضوا للضغط والتنمر بسبب دينهم مع إغفال تام لجوانب حياتهم الشخصية ومشاكلهم اللي بيشترك فيها ناس كتير زيهم.
كل شخصيات المسلسل وأبطاله أدوارهم مميزة فعلاً، وأداءهم الواقعي بيخلينا نصدقهم ونعيش معاهم زي مثلاً عمرو واكد اللي بيلعب دور”فاروق” والد رامي في شكل أول مرة نشوفه فيه. فاروق طالع أب سلبي ساب بلده وجري ورا حلمه، وبعدين انتهى بيه المطاف بين مشاكل ومسؤليات أكبر من قدرة تحمله. الأب فاروق كان انتشر ليه مشهد من المسلسل على السوشيال ميديا في الأيام اللي فاتت بيتريق فيه على الكلبة بتاعته اللي أكتشف إن عندها اكتئاب، وبيقارن ظروفها بمشاكل حياته الشخصية، والمشهد ده كان سبب في معرفة ناس كتيرة بالمسلسل ومتابعتهم ليه علشان يعرفوا عنه أكتر.