فيروس الكورونا وفصل الصيف.. إزاي تحمي نفسك
الصيف دخل علينا وخلاص، وللأسف، مش هيكون زي أي صيف قبل كدا بسبب وباء “كوفيد-19″، اللي لحد دلوقتي وصلت حالات الإصابة بيه في العالم لأكتر من 7 مليون حالة، وحط أكتر من تلت سكان العالم تحت نوع من أنواع حظر التجوال.
الفيروس شرس في سرعة انتقاله بين المستضيفين، وتأثيره شديد على كبار السن وأصحاب المناعة الضعيفة، وعشان المجتمع العالمي يقدر يحمي أفراده منه تم تطبيق مجموعة من الإجرائات الاحترازية اللي كان منها وقف حركة الطيران وتعطيل الأنشطة الترفيهية وتطبيق التباعد الاجتماعي، ولحد دلوقتي في دول كتير في عالمنا العربي القواعد دي لسه سارية، وإن بدأت دول كتير ترفعها بشكل تدريجي بعد سيطرة جزئية على الوضع لتحريك عجلة الاقتصاد.
الصيف السنة دي مش هيكون فيه سفر برا، ومنظمة الصحة العالمية بتحذر الناس من التجمع على الشواطئ عشان تقل فرص انتشار الفيروس. في وقت صعب زي ده وبعد 3 شهور من عزلة في البيت، كتير مننا مبقاش مستحمل، وكله كان بيأمل إن الموضوع يتلحق مع دخول الصيف عشان نقدر نستمتع بيه، لكن من الواضح إن الأزمة لسه مستمرة بالرغم من رفع كتير من الإجرائات، وعشان كدا لازم ناخد بالنا أكتر ونحاول نلتزم بشوية قواعد بسيطة عشان نحمي نفسنا والناس اللي بنحبها. عشان كدا قررنا نجمع ليكم شوية إجرائات أساسية لازم تدخلوها في الروتين اليومي بتاعكم عشان تضمنوا صحتكم.
حاول تفضل لابس الكمامة على طول
يمكن لبس الكمامة لساعات متواصلة من أكتر الحاجات اللي ممكن تكون مش مريحة، بس دي أكتر طريقة ممكن تحمي نفسك بيها، بالذات لو المجتمع كله لبسها في نفس الوقت. الدراسات اثبتت إن لو شخص مصاب لابس كمامة أو قناع وجه ده بيقلل بنسبة كبيرة فرص انتشار الفيروس منه لشخص تاني، بس عشان الحل ده ينفع في مواجهة الأزمة لابس كلنا نلبس الكمامة، ونلبسها بشكل صح، بحيث تغطي الفم والأنف بشكل كامل.
ناس كتير بتسأل إيه هي أحسن كمامة، والسؤال ده بيحير ناس كتير وهما بيحاولوا يشتروا كماماتهم، وعشان نحسم الجدل، لحد دلوقتي الخبراء اجمعوا إن كمامة الـ N95 هي أكتر حاجة ممكن تحميك، بس عشان ندرتها في السوق مش سهل إنك تشتري واحدة، غير كدا الأطقم الطبية في أشد الحاجة ليها عن المستخدم العادي، فيستحسن إن عامة الشعب تلبس الكمامات الجراحية ذات الاستخدام الواحد أو كمامات القماش.
وعلى الرغم إن كتير بينتقدوا حل كمامات القماش، إلا إنها عملية خصوصًا إنها بتحافظ على البيئة أكتر من الأنواع التانية، ومع الغسيل الكويس ممكن تعيد استخدامها أكتر من مرة، مراكز السيطرة على الأمراض والوقاية منها (CDC) بأمريكا بتنصح بإن أي غطاء على الوش حتى لو كان باندانه أحسن من مفيش.
حافظ على مسافة بينك وبين غيرك
التباعد الاجتماعي يمكن من أهم الإجرائات اللي ممكن نطبقها في وقتنا ده؛ أحسن حل طبعًأ هو إنك تفضل في البيت بس لو مضطر تنزل، فحاول تحافظ على مسافة بين متر أو 2 متر بينك وبين الشخص اللي بتتفاعل معاه عشان تضمن إن الفيروس مش هيتنقلك، خصوصًا إن في نظريات دلوقتي بترجح إن الفيروس بيتنقل مع الهواء مش بس من خلال الرذاذ.
اغسل ايدك وحاول تعقم الأسطح اللي حواليك دايمًا
غسل الإيدين بالمياة والصابون بشكل دوري يمكن يكون أحسن سلاح لمواجهة فيروس الكورونا المستجد. الصابون العادي يقدر يدمر الغطاء الدهني للفيروس ويقضي عليه بشكل كامل. عشان كدا محتاج تغسل إيدك كويس لأكتر من نص دقيقة قبل ما تلمس وشك.
الكحول الـ 70% أو أكتر برضه فعال جدًا في تعقيم الأسطح اللي حواليك بشكل دوري زي شاشة الموبايل أو اللابتوب أو أي خاجة إنت هتدخلها للبيت من برا عشان تقدر تضمن سلامتك وسلامة الناس اللي بتحبها.
كل أكل صحي وإشرب سوايل كتير
حافظ على أكلك بحيث يكون فيه كل العناصر اللي جسمك بيحتاجها بشكل متوازن وصحي من غير ما تكتر في السكريات والنشويات الصناعية، وحاول تكتر من أكل السلطة الخضراء والفواكة بأنواعها عشان جسمك يوصله الفيتامينات اللي محتاجها عشان تقوي المناعة وتقدر تحمي نفسك من الفيروس.
العب رياضة
دراسات علمية كتير اثبتت بإن ممارسة الرياضة بشكل دوري بتساهم في تقوية جهازك المناعي بالذات إنها بتساعد في زيادة الأجسام المضادة وخلايا الدم البيضاء اللي بيحاربوا الفيروسات والميكروبات اللي بتدخل جسمك.