عيان بسبب تقلب الجو؟ دي وصفات بسيطة وطرق هتساعدك تتغلب على البرد

احنا طبعًا مش بنتكلم عن “البرد” اللي كلنا بنبقى عارفين أعراضه بتنم على وجود إيه. لإن في الحالات دي بيبقى لازم نروح لدكتور يديلنا العلاج والبروتوكول في حالة الإصابة بفيروس كورونا. ولكننا بنتكلم في حالة وجود برد بسيط بالفعل بسبب تقلبات الجو والطقس البارد.

في أكلات ومشروبات بسيطة ممكن تتعمل في البيت، واللي بتساعد على زيادة المناعة ومقاومة البرد، أو على الأقل بتحسن الحالة ولو بشكل بسيط بجانب الأدوية. فمن غير ما نطول عليكم، تعالوا نعرف أكتر عنهم وعن المعلومات الطبية وفقًا لمقالات وأبحاث طبية.

ابدأ بالمشروبات الدافية

السوائل الساخنة بتساعد على تفكيك الإفرازات في الصدر والجيوب الأنفية، وده اللي بيسهل طردها وكمان بيزيل احتقان الزور. الشاي بالعسل واللمون بشكل خاص، بيساعد في محاربة البرد. وممكن كمان تلجأ للمشروبات السخنة اللي فيها الزيوت الطيارة، وهي الريحة اللي في المشروبات زيّ الينسون والنعناع والقرفة، لإنها بتزود نسبة المياه في جسمك ودرجة الحرارة الدافية هتقلل أي تهيج ممكن يسبب التهاب في الصدر.

خد حمام دافي

وفقًا لـ Healthline، الحمامات الدافية ممكن تقلل من أعراض البرد والإنفلونزا. وإضافة مكونات زيّ ملح إبسوم وصودا الخبز للمياه ممكن تقلل من آلام الجسم. وكمان إضافة قطرات من الزيت العطري، زيّ شجرة الشاي أو العرعر أو إكليل الجبل أو الزعتر أو البرتقال أو الخزامى أو الأوكالبتوس، ممكن يكون له تأثير مهدئ للجسم.

شوربة الفراخ أو الخضار

الأبحاث بتقول إن الاستمتاع بطبق من الشوربة بالفراخ مع الخضار، ممكن يبطئ من حركة العدلات في جسمك. العدلات هي نوع شائع من خلايا الدم البيضاء، بتساعد في حماية جسمك من العدوى. ولما تتحرك ببطء بيكونوا أكثر تركيزًا في مناطق الجسم اللي بتتطلب أكبر قدر من العلاج.

استنشاق البخار – إضافة رطوبة للهواء

استنشاق البخار بيساعد على مواجهة الزكام وترطيب الأغشية المخاطية اللي بيعمل على إذابة المخاط، و بالتالي بيتم طرده بصورة أفضل، زيّ مفعول المشروبات الساخنة. ممكن تجيب وعاء تحط فيه مياه مغلية وتضيف له بعض الأعشاب المفيدة وبعدين تستنشق البخار اللي بيطلع. حاجة شبيهة ممكن تعملها هي استخدام بعض الأجهزة اللي بتضيف رطوبة للهواء لإنه بيقوم بنفس المهمة وبيدي نفس المفعول.

خد قسط كفاية من الراحة والنوم

النوم لعدد ساعات كافية وقت المرض أو التعب ضروري لشفائك. فبيساعد النوم على تقوية جهاز المناعة علشان تقدر تحارب البرد بشكل أكثر فعالية.

الزنجبيل

شرايح قليلة من الزنجبيل في مياه مغلية أو دافية بتساعد على تهدئة السعال أو التهاب الحلق، لإنه بيرخي الأغشية في الشعب الهوائية. وبتشير الأبحاث كمان إنه بيقلل من الشعور بالغثيان اللي غالبًا بييجي مصاحب الإنفلونزا أو البرد.

آخر كلمة: خلوا بالكم من صحتكم، وخصوصًا الفترة دي!