بتمتاز أراضي مصر بمناطق مختلفة تُعتبر نظم بيئية متكاملة، والمناطق دي هي اللي بيتم الاعتراف بيها محليًا ودوليًا كمحميات طبيعية، للعمل على استدامة النظام البيئي اللي فيها. وفي سياق العمل اللي بتبذله مصر في الوقت اللي بتستضيف فيه مؤتمر المناخ العالمي COP27، انتهت وزارة البيئة قطاع المحميات الطبيعية من تطوير عدد من محميات سيناء، وبالذات محمية “نبق” اللي هيتم تقديمها كتجربة متميزة للوفود المشاركة من دول العالم في المؤتمر.
وعلشان التطويرات اللي حصلت في محميات جنوب سيناء هتخلي تجربة الزيارة أفضل بكتير، جبنالك 5 محميات تقدر تزورهم، وكل المعلومات اللي محتاج تعرفها عنهم.
محمية رأس محمد
المحمية في شرم الشيخ، عند نقطة التقاء خليج السويس بخليج العقبة، وتُعتبر تاني أهم محمية طبيعية في العالم بعد محمية “أولورو- كاتا بارك تجوتا” في أستراليا، وتُعتبر من أكبر وأهم 3 مراكز للغوص في العالم، وده لإن فيها تلات أنظمة بيئية بحرية؛ هما البحر الأحمر وخليج السويس وخليج العقبة، بالإضافة للنظام البيئي الجبلي.
تمتد المحمية على شكل رأس مثلث، وأضلاعه عبارة عن سلاسل جبال تقع في جنوب سيناء، واللي بيشوفها الزوار على شكل رأس راجل له لحية، وعلشان كده اتسمت “رأس محمد“. هتقدر تشوف في المحمية مجموعة نادرة من الحيوانات؛ زيّ الوعل النوبي، الثعالب، الضباع، الأرانب الجبلية، الغزلان، والماعز الجبلي، بالإضافة للأسماك النادرة والشعاب المرجانية وتعابين البحر وسلاحف الترسة البحرية، ونباتات نادرة زيّ أشجار المانجروف.
بيتميز جو المحمية بالاعتدال طوال أيام السنة، وعلشان كده مش هتحتاج غير ملابس صيفية خفيفة أو ملابس البحر العادية وأنت هناك، وتقدر تبات في منطقة التخييم، بس لازم تبلغ إدارة المحمية، وتسلم الهوية الشخصية عند البوابة، وتدفع رسوم الدخول والتخييم. بيدير منطقة التخييم بالكامل بدو المنطقة، وبيوفروا خيام للراحة والنوم، وأماكن للشواء، وكل حاجة ممكن تحتاجها في التخييم.
محمية نبق
المحمية الساحرة، اللي بتمتاز بتنوع بيئي كبير ما بين بحري وجبلي وصحراوي، تقع في جنوب سيناء بين دهب وشرم الشيخ ووادي أم أدوي، على بعد حوالي 35 كيلومتر شمال شرم الشيخ. وفيها مناطق كتير للتخيم، منها منطقة “جبل النخيل” اللي بتمتد فيها أشجار النخيل على طول ساحل البحر.
التخييم في منطقة الدجال هو تجربة استرخائية ساحرة، هتستمتع فيها بصفاء مياه البحر والنباتات والحيوانات الصحراوية، ومنطقة “الرويسية مانجروف” هتعيشك وسط غابات أشجار المانجروف، اللي بتعيش في المياه المالحة، وبتقدر تستخلص المياه العذبة وتطرد الأملاح عن طريق أوراقها، وهتشوف الأملاح متراكمة على الأوراق.
أما منطقة “الغرقانة” فتقدر تغطس فيها، وتشوف الحيوانات البحرية والأسماك والشعاب المرجانية، وفي مختلف مناطق المحمية، هتقدر تغطس وتستمع ببيئة بحرية غنية بمختلف أنواع الحيوانات البحرية، وتقدر تستمتع بالتخييم مع حيوانات صحراوية نادرة؛ زيّ الغزلان، والتيران، والتعالب، والوبر، وأنواع مختلفة من الزواحف والقوارض والطيور المستقرة والمهاجرة؛ زيّ النسور وطيور مالك الحزين.
درجات الحرارة في المحمية معتدلة معظم أوقات السنة، وتقدر تزورها بملابس قطنية خفيفة أو ملابس البحر على طول، وهتلاقي هناك فنادق كتير، واللي أكيد هتلاقي فيها حاجة مناسبة لميزانيتك بالظبط.
محمية سانت كاترين
هي أكبر محمية طبيعية في مصر من حيث المساحة، وموجودة في جنوب سيناء في محافظة شرم الشيخ، بين تلاتة من أعلى الجبال في مصر، جبل “سانت كاترين” وجبل “موسى” وجبل “الصفصافة”.
بالإضافة لكونها منظومة بيئية مميزة، لاحتوائها على مجموعة كبيرة من الحيوانات والنباتات والطيور والزواحف المعرضة للانقراض، تُعتبر محمية سانت كاترين مركز أثري مهم، بسبب وجود دير سانت كاترين ومجموعة آثار العصر البيزنطى، وآثار تانية من العصور المصرية القديمة.
في المحمية هتصادف مجموعة كبيرة من الحيوانات الصحراوية والجبلية؛ زيّ التعالب والضباع والتياتل والغزلان والوعول والأرانب البرية والذئاب والقنفذ العربي والفأر الشوكي والجربوع، وهتصادفك كمان أنواع مختلفة من الطيور؛ زيّ اللقلق والنسر والصقر والعقاب وبومة بتلر والغراب والعصفور والنعار والدرسة.
لإن سانت كاترين منطقة داخلية، مش بتطل على أي سواحل بحرية، تقدر خلال زيارتك تركز على جمال المنظومة البيئية البرية للمنطقة، سواء الصحراوية أو الجبلية، وتقدر تتسلق جبل سانت كاترين وتستمع بتساقط الثلوج على قمة الجبل في فصل الشتاء؛ ديسمبر ويناير وفبراير.
أما في باقي فصول السنة، فبتكون درجة حرارة المحمية معتدلة، وبالتالي تقدر تستمتع بأجواء صيفية جميلة، والجدير بالذكر، إن كل المعالم الموجودة في المحمية متوفرة مجانًا للزوار.
محمية أبو جالوم
المحمية الواقعة على الطريق الواصل بين شرم الشيخ وطابا، بتتميز بطبوغرافية فريدة بتقترب فيها الجبال من سواحل البحر الأحمر، وفيها نظام بيئي شديد الثراء، بيتنوع بين الشعاب المرجانية، والكائنات البحرية، والحشائش البحرية، واللاجونات، والأنظمة البيئية الصحراوية والجبلية.
تقدر تستجم على شواطئ المحمية، أو تستمتع بنظامها البيئي البحري الرائع من خلال الغوص أو السنوركل، ولإن المحمية بتمتاز بنظام كهوف معقد تحت الماء، تعتبر واحدة من أهم مناطق الغوص في العالم. كمان تقدر تستمتع بالسفاري في صحاري المحمية، وتشوف نباتاتها المميزة، والحيوانات اللي بتعيش فيها.
الوصول للمحمية سهل، فتقدر تسوق أو تاخد مواصلات، وأول خط تقدر تاخده هو الطريق الساحلي من منطقة نويبع، أو من خلال طريق وادي رساسة، أو توصل لدهب وهناك توصل للبلو هول وتتمشى أو تاخد جمل لأبو جالوم، اللي تبعد عنها حوالي 8 كيلو متر.
تقدر تزور المحمية في أي وقت من السنة، بس ماننصحكش تزورها في أوقات ذروة الصيف، بالذات في شهر يوليو وأغسطس لإن درجات الحرارة بتكون مرتفعة جدًا، غير كده كل أيام السنة بتكون وقت مناسب وجميل للزيارة.
محمية طابا
المحمية موجودة في المنطقة الجنوبية الغربية لمدينة طابا، وبتتميز بتراكيب جيولوجية وكهوف وممرات جبلية، وشبكة من الوديان، أهمها وديان وتير والزلجة والصوان ونخيل، بالإضافة للعيون الطبيعية، واللي بتتكون حواليها حدائق نباتية بيتجمع عندها البدو.
بتتميز المحمية كمان بتنوع بيولوجي هائل من حيوانات ونباتات نادرة ومعرضة للانقراض، بالإضافة للمواقع الأثرية اللي بيوصل تاريخ بعضها لحوالي 5000 سنة، ده غير التراث التقليدي للبدو اللي عايشين فيها.
تُعتبر المحمية من أجمل شواطئ سيناء ومصر، وده بسبب موقعها الفريد على ساحل البحر الأحمر، وثراء الشواطئ دي بالشعاب المرجانية الجميلة بيخليها وجهة مميزة للغوص والسنوركلينج.
تقدر تستمتع بطبيعة المحمية، بالإضافة لمشاهدة الطيور البرية اللي بتعيش على قمم الجبال هناك، وتزور الوديان اللي فيها كتير من الحيوانات البرية النادرة، وتعيش أجواء البدو التقليدية والتراثية.
ازاي نقضي وقت لطيف في المحميات دي من غير ما نضر نظامها البيئي؟
العالم النهارده بيعيش أزمات مناخية كبيرة، واللي بتستضيف مصر مؤتمر المناخ علشان تفتح مساحة نقاش بين دول العالم بخصوصها. وبتأثر الأزمات دي بشكل مباشر على النظام البيئي في العالم كله، وبالتالي المحميات الطبيعية اللي في مصر تعتبر ثروة كبيرة لازم نعرف ازاي نستمتع بها من غير ما نضر نظامها الإيكولوجي الهش.
اتأكد إنك ما تسيبش أي مخلفات بلاستيكية وراك، لإن أي حاجة بلاستيك بتدخل في النظام البيئي ومش بتخرج بالتحلل غير بعد 100 سنة أو أكتر، وده بيسبب اضطراب في النظام وبيقتل الحياة البرية.
استخدم منتجات طبيعية لنظافة جسمك، زيّ كريمات الحماية من الشمس وغسول الفم ومعجون الأسنان، لإن المواد الكيميائية الغريبة بتسبب تسمم للحياة البرية. واتعامل مع أي نار بتشعلها بشكل مسؤول، لإن المناطق الصحراوية في المحميات بيكون فيها نباتات جافة كتير ممكن تشتعل بسهولة، وتسبب حريق هيضر النظام البيئي، وهيشكل خطر كبير على الناس اللي موجودة معاك.
بلاش تأكل الحيوانات اللي موجودة في المحميات، علشان أولًا ماتجذبش الحيوانات البرية لأماكن التخييم، وده ممكن يكون خطر عليهم وعلى المخيمين، وعلشان معظم الأكل اللي البشر بياكلوه بيكون مش مناسب للحيوانات البرية، وبيسبب لهم مشاكل هضم وآلام كتير، ومشاكل صحية خطيرة.
اتأكد إنك ما ترميش أي حاجة في المياه، وماتسيبش وراك أي حاجة، ومتاخدش معاك أي حاجة من المكان اللي بتزوره، لإنك ممكن تاخد معاك حاجة مهمة للحياة البرية، وده ممكن يسبب اضطراب في النظام الإيكولوجي.