الصيف يعني بحر ورمل وشمس، وبالنسبة لي التسمير حاجة أساسية في إجازة المصيف، لازم أخد اللون البرونزي الجميل وأرجع الشغل أسمراني ومصيف. ورغم إن التسمير عملية بسيطة، لكن اكتشفت إن في حاجات بنعملها ممكن يكون لها تأثير ضار على صحتنا وعلى البيئة البحرية حوالينا.
جلسات التسمير في الوقت الغلط: الأشعة فوق البنفسجية وسرطان الجلد
علشان الشمس بعد الضهر بتكون قوية وتأثيرها جامد في التسمير كنت دايمًا بحط الكريم الواقي من الشمس وزيت التسمير واتنقع في الشمس ساعة ساعتين وأقوم ضارب اللون الجامد وأروح، لكن اكتشفت إن ده غلط جدًا.
الدكتور علاء أبو سمرة، أخصائي الجلدية والتجميل، بيقول إن أحسن وقت ناخد فيه جلسة تسمير هو الصبح لحد قبل الساعة 11، علشان بعد كده بتكون نسبة الأشعة فوق البنفسجة عالية جدًا، ومهما حطينا كريم واقي من الشمس، هيفضل جلدنا يمتص نسبة كبيرة من الأشعة دي واللي ممكن تسبب سرطان الجلد. فازاي نعرف نسبة الأشعة فوق البنفسجية في المكان اللي احنا فيه؟
أطلقت منظمة الأمم المتحدة بالتعاون مع منظمة الصحة العالمية تطبيق إلكتروني SunSmart علشان يساعد الناس تحمي نفسها من الأشعة الفوق بنفسجية، خصوصًا إن نسبة المصابين بسرطان الجلد مرتفعة جدًا في العالم، وتقدر من خلال التطبيق تعرف توقعات نسبة الأشعة الضارة في منطقتك لمدة 5 أيام، وبيدي نصايح عن ازاي تتجنبها وتحمي نفسك منها. والتطبيق مش بس لجلسات التسمير والصيف، هيفيدك طول الوقت علشان تحمي نفسك من سرطان الجلد.
الواقي من الشمس: أخطاء في الاستخدام وأضرار على الشعب المرجانية
بيقول الدكتور علاء إن أحسن طريقة لاستخدام واقي الشمس مع زيت التسمير هو إننا نحط الواقي الأول ونستناه 10 دقايق علشان الجلد يمتصه، وبعد كده نحط زيت التسمير، أما لو هننزل البحر، فلازم نحط الواقي كل نص ساعة، أو على حسب التعليمات اللي مكتوبة عليه. وبيوضح أبو سمرة إن الواقي بيدوب في المياه وبعد نص ساعة بنبقى معرضين للشمس مع المياه المالحة على جلدنا، وده بيزود من خطر حروق الشمس، وبدل السمار اللذيذ اللي عايزينه، جلدنا هيتحرق ويحمر ويقشر وهتبقى مشكلة.
أما موقع الحفاظ على الشعب المرجانية، Save the reef بيحذرنا من استخدام أنواع معينة من واقي الشمس لإنها بتضر الشعب المرجانية وبتسبب موتها، وده لإن بقايا بعض أنواع واقي الشمس بتحجب أشعة الشمس عن الشعب المرجانية وبتخنقها. ازاي نعرف إذا كان واقي الشمس اللي معانا ضار بالشعب المرجانية ولا لأ؟
بيقول موقع الحفاظ على الشعب المرجانية إن أنواع الواقي اللي فيها جزيئات نانوية ضارة جدًا للشعب المرجانية، وممكن نعرف مدى ضرر الواقي من خلال قراءة مكوناته، فـلو كان فيه مواد زيّ الأوكسي بينزين والأكتينوكسيت والأوكتوكريلين.. ومواد تانية هتلاقيها هنا، يبقى الواقي ده بيسبب موت الشعب المرجانية، أما لو مالقتش أي حاجة من المواد الموجودة في القائمة دي داخلة في مكونات الواقي، يبقى آمن على الحياة البحرية.
زيوت التسمير: ما بين المواد المصنعة والخلطات الطبيعية
كنا قاعدين ندردش عن التسمير والكلام جابنا عن الخلطات الطبيعية اللي ناس بتستخدمها كزيوت تسمير، فواحدة من صحابنا حكت لنا عن مرة سمعت فيها كلام صاحبتها واستخدمت زيت تسمير معمول من زيت الزيتون وزيت الجزر وزيت السمسم ومواد طبيعية تانية واتحرقت، بتقول إن جلدها حرفيًا اتحرق، وإن دي كانت تجربة وحشة أوي.
في نفس الوقت، في ناس قالت إنها استخدمت خلطات التسمير الطبيعية وكانت النتيجة عظيمة، وفي السياق ده بيقولنا أبو سمرة إن كل واحد مختلف، وبالتالي الطريقة اللي جلده بيستجيب بيها للأنواع المختلفة من الزيوت والخلطات بتكون مختلفة.
وبيقول أبو سمرة إن زيوت التسمير اللي بنشتريها من المحلات جاهزة بيكون أتوافق عليها من منظمات الصحة العالمية والمحلية بعد تجارب كتير، وبالتالي فهي أمان لكن برضه ممكن تتفاعل مع بشرة شخص معين بطريقة ضارة.
وفي نفس الوقت بيأكد أبو سمرة إن مش كل حاجة طبيعية بتكون خالية من الضرر، لإن الزيوت زيّ زيت الزيتون وجوز الهند وغيرهم عارفين إنها أمان لإننا بناكلها من قديم الأزل وعارفينها، لكن استخدامها كزيت تسمير وتعريض جلدنا للشمس بطريقة مباشرة والزيوت دي عليه ممكن يسبب تفاعل ضار برضه.
أخيرًا بيوضح أبو سمرة إن أفضل طريقة علشان نعرف إذا كان تأثير خلطة أو منتج بشرة معين على جلدنا فعال وآمن ولا لأ، هي إننا نستخدمه على مساحة صغيرة من الجلد في الأول ونشوف هتكون النتيجة كويسة ولا وحشة.