ياما عينه دمعت بسبب الأهلي، دمعت من الحزن على رحيل لاعب ودمعت من الفرحة على بطولة، عم حارث رئيس المهمات في غرفة خلع الملابس في النادي الأهلي اختبر حاجات كتير مع النادي، من وقت ما جه من سنة 1973 لما كان مرتبه 3 جنيه، سنين ومواقف عاشها كون فيها الأهلي معاه ذكريات لحد ما بقى من أبرز الشخصيات المرتبطة بتاريخ النادي، وكل ده من غير حتى ما يلعب. بس النهارده قرر ينهي مشواره ويعتزل ويسيب النادي وأبناء النادي بعد ماكانوا بيعتبروه تميمة الحظ ليهم.
حقق معاهم الإنجازات والبطولات اللي وصلت لـ90 بطولة كاملة مع الفريق، 32 دوري عام، 18 كأس مصر، 14 سوبر مصري، 12 دوري أبطال أفريقيا، و 8 سوبر أفريقي، بيشوفوه قبل الماتش وبيحتفل معاهم بعده في لحظات البطولات أو يواسيهم في لحظات الهزيمة ودايمًا في الماتشات المهمة بيلبس تيشرت النادي، وأوقات كان بيظهر معاهم في إعلانتهم التجارية.
كان معروف عن عم حارث أنه بيدوخ الصحفيين علشان ياخدوا منه بس تصريح، بس من الأحداث اللي مايقدرش ينساها مع الأهلي لحظة وفاة محمد عبد الوهاب ومذبحة بورسعيد.
عم حارث أقدم “عامل غرفة خلع الملابس” في النادي الأهلي ويمكن في الأندية المصرية عاش حياته بين جدران القلعة الحمراء .. برحيله هيسب فراغ لعشاق القلعة الحمراء.