علشان كتير مايعرفوش: وحدة مناهضة العنف ضد المرأة في الجامعات

علشان احنا كمان عرفنا عنها بالصدفة للأسف، من دراسة اتعملت من مركز تدوين، شارك فيها ستات من كل 27 محافظة في مصر، نتيجتها وضحت إن 92% من اللي شاركوا في الدراسة مايعرفوش بوجود وحدة مناهضة العنف ضد المرأة داخل الجامعات في مصر، واللي بتقوم بدور كبير في دعم المرأة ضد أي عنف بتتعرضله، أيًا كان نوعه، عايزين نعرف أكتر عن الوحدات دي داخل الجامعات لإن أغلب الستات اللي بتتعرض للعنف ماتعرفش بوجودها وبالمساعدة اللي ممكن تتقدملها من خلال الوحدات دي.

الوحدة دي بتساعد الستات لو حصل وتعرضت لأي شكل من أشكال العنف الجسدي أو اللفظي، أو أي نوع من التمييز داخل الحرم الجامعي، وبتحافظ كمان على سرية التحقيق في الواقعة من الجهات المختصة، كمان بتقدم الدعم النفسي والاجتماعي لكل اللي بيتعرضوا لعنف أيًا كان نوعه، داخل الحرم الجامعي، يعني هتساعدك تجيبي حقك بتحقيق رسمي، وكمان هيدعموكي نفسيًا واجتماعيًا. الوحدات موجودة في جامعات مصر من الدلتا للصعيد.

الوحدات كمان بتنظم ندوات ومناقشات مختلفة ومسابقات، بيحضرها متخصصين في كل المجالات اللي بيتم مناقشتها، بتزود التوعية عند الطلاب مش بس في مجال حقوق المرأة، كمان مجالات كتير تأهلهم يكونوا على وعي بكل القضايا اللي بتدور حوليهم، وكمان حفلات موسيقية في الجامعات.

زيّ ما شوفنا “وحدة المرأة الآمنة” في مستشفيات مصر، لدعم الصحة النفسية للمرأة ومواجهة العنف اللي بتتعرضله سواء جسدي أو نفسي، المجلس القومي للمرأة ووزارة الصحة تعاونوا لإنشاء “وحدة المرأة الآمنة” في عدد من المستشفيات، منهم مستشفي القصر العيني ومستشفى المنصورة، الوحدة مخصصة لاستقبال وتقديم الدعم الطبي والنفسي والخدمات للسيدات اللي تعرضت للعنف، وده ضمن المبادرة اللي أطلقتها الأمم المتحدة لمناهضة العنف ضد المرأة. كل دي خطوات إيجابية بتدعم المرأة وبنتمنى نشوف مبادرات مختلفة في نفس الاتجاه.

آخر كلمة: ماتفوتوش قراءة: لمواجهة العنف ضد المرأة.. “وحدة المرأة الآمنة” في مستشفيات مصر

تعليقات
Loading...