علامات هتساعدكم علشان تعرفوا إن أنتم في علاقة مؤذية
أوقات كتير بنكون جوا علاقة مؤذية بأشكال كتير، خصوصًا العلاقات العاطفية، لكن مبنكونش واخدين بالنا، علشان زيّ ما بيقولوا “مراية الحب عميا”، أو “اللي جوا الماتش مش بيبقى شايف زيّ المدرب”، بمعنى إن في علامات كتير بتصرفات ومواقف ممكن تكون بتعديها من غير تركيز، لكنها بتبقى إشارات على إن العلاقة اللي أنت فيها مؤذية، بأشكال كتير، سواء كنت راجل أو ست، ولو إن المُشاع أو اللي منتشر هو إن اللي بتكون في الموقف ده هي الست وبتتأذي، ولكن برضه فيه نسبة من الرجالة بتتعرض لده علشان الأذى مش مرتبط بنوع، إيه هي العلامات دي؟
أول حاجة مش شرط نوع الأذى يكون مباشر أو عنيف زيّ الضرب مثلًا، فيه حاجات كتير تانية بتأذي نفسيًا وبتكون مش باينة أوي، لو لقيت في علاقتك 3 علامات من دول، يبقى لازم تهرب بسرعة.
يعزلك عن العالم
![](https://ar.scoopempire.com/wp-content/uploads/sites/4/2020/11/interval-house-of-ottawa-shelter-vaw-dec-2017.jpg)
وده لما شريكك يخلي حياتك كلها بتتمحور حواليه هو بس، وتبعد عن الناس اللي حواليك والقريبين منك وكمان يبعدك عن الحاجات اللي بتحبها، سواء العزل ده كان بشكل أوامر مباشرة أو بالضغط النفسي زيّ مثلًا إنه يحسسك بالذنب لما تعمل كده فتضطر واحدة واحدة تبطل كل الحاجات اللي بتسبب مشاكل بينكو، وده بيكون بدافع الحب أو الغيرة أو عدم تقبله لعيلتك وأصدقائك، العزل ده كارثة وبيخليك معتمد بشكل كامل في حياتك على شخص واحد بس، وهو بيكون ليه حياته الكاملة كمان، وافتكر دايمًا إن الحب مبيتعارضش مع وجود مساحات شخصية.
مش بيبذل مجهود لعلاقتكم
العلاقات دايمًا بتقوم على مجهود الطرفين مع بعض، ومينفعش يكون طرف واحد هو اللي بيبذل مجهود والطرف التاني مبيقدمش أي حاجة لاستمرار العلاقة، ده يعتبر استنزاف واستغلال، وبيسبب مشاكل كتير لإن الطرف اللي بيبذل المجهود هو اللي دايمًا بيدوّر على حلول لمشاكل العلاقة وبيشارك الطرف التاني كل لحظاته وبيقدم الحب والدعم، لكنه في المقابل مبياخدش أي حاجة وده بيحول العلاقة لأذى وبيخل بتوازن العلاقة كلها.
الشعور بالذنب
![](https://ar.scoopempire.com/wp-content/uploads/sites/4/2020/11/5-أمور-تمكنك-من-استعادة-الثقة-في-علاقتك-بشريكك-1024x536.jpeg)
لما دايمًا الطرف التاني يحسسك إنك مسئول عن كل حاجة بتحصل في حياته، أو بيشيلك الذنب لحاجات خارج إرادتك، وإنك من واجباتك إنك تخليه سعيد في حياته وكمان تحل مشاكله أو تعالجه من أمراض نفسية كمان زيّ الإكتئاب، كل ده مش مفروض عليك.
ينتقدك طول الوقت
لما يبقى بينتقد كل أفعالك وتصرفاتك، ومهما كنت بتحاول تكون أحسن، خصوصًا لما يكون الانتقاد بطريقة مبالغ فيها ومستمر ومش بلطف ونصيحة، ده هيهز ثقتك في نفسك وهيأثر بالسلب على علاقتكم، وهيخليك مش مرتاح ودايمًا حاسس إنك غلط ومش هتلاقي الدعم منه في أي حاجة بتعملها، على عكس المفروض إننا نلاقي الدعم من اللي بنحبهم.
الخوف المستمر من إنهاء العلاقة
![](https://ar.scoopempire.com/wp-content/uploads/sites/4/2020/11/uRw9I.jpeg)
لما تكون دايمًا خايف إن الطرف التاني يسيبك، أو إنه يكون بيهدد بطريقة مباشرة كمان في كل مشكلة تقابلكوا إنه ينهي العلاقة، أو تكون بتخاف من رد فعله ومش حاسس بأمان، دي أكتر حاجة بتهدد العلاقة لإن أساس العلاقات هي الأمان، ليه تكون في علاقة دايمًا حاسس فيها بالخوف والقلق المستمر وعدم الاستقرار؟
مش مسئول عن كلامه أو يتهمك بإنك بيتهيألك
لما الطرف التاني يكون بيقول الكلام ويرجع فيه، ولما تواجهه بالكلام يتهمك إنه لا أنت بيتهيألك أو أنت اللي بتنسى، وتوصل لإنك تبقى بتشك في نفسك وتجيب اللوم على نفسك لإنك مقتنع إن اللي قدامك مبيكدبش وواثق فيه ثقة عمياء، لكن لأ، لما تحس إن الكلام بيتغير أو الشخص اللي قدامك مش مسئول عن كلامه وبيتهمك اتهامات تافهة زيّ دي علشان يخرج من الموقف، اهرب من العلاقة دي.
التحكم في الماديات خصوصًا في فلوسك انت
![](https://ar.scoopempire.com/wp-content/uploads/sites/4/2020/11/140127101428625.jpg)
لو الطرف التاني في العلاقة دايمًا بيتحكم في إنك تصرف فلوسك في إيه ومتصرفهاش في إيه، وبيفرض عليك ده بشكل أو بآخر سواء بالأوامر أو بالطريقة الهادية اللي تحسسك بالذنب لو منفذتش اللي هو عايزه، لو ملقتش الاستقلال المادي في علاقتك، ده مؤشر خطر على إنها علاقة مؤذية.